Video : टीम इंडियानं इंग्लंडमध्ये फडकावला तिरंगा; BCCI ने शेअर केलेला व्हिडिओ पाहाच

लंडन : भारत आणि इंग्लंडदरम्यान पाच कसोटी सामन्यांच्या मालिकेतील दुसरा कसोटी सामना खेळला जात आहे. चौथ्या दिवसाचा खेळ सुरू होण्यापूर्वी भारतीय क्रिकेट संघातील सर्व खेळाडू आणि सहकाऱ्यांनी इंग्लंडमध्ये भारताचा ७५वा स्वातंत्र्य दिन साजरा केला. भारतीय संघाचा कर्णधार विराट कोहली आणि प्रशिक्षक रवी शास्त्री यांनी संघ सहकाऱ्यांच्या उपस्थितीत तिरंगा फडकवला आणि एकत्रितपणे राष्ट्रगीतही गायले. या विशेष प्रसंगाचा व्हिडिओ भारतीय क्रिकेट नियामक मंडळाने (बीसीसीआय) आपल्या सोशल मीडिया अकाउंटवरून शेअर केला आहे.


विशेष म्हणजे चौथ्या दिवशी भारतीय संघाने आपल्या दुसरा डावालाही प्रारंभ केला. तिसऱ्या दिवशीचा खेळ संपताच इंग्लंडने डाव घोषित केला होता. कर्णधार जो रूटच्या नाबाद १८० धावा आणि चौथ्या विकेटसाठी जॉनी बेअरस्टोसह केलेल्या १२१ धावांच्या भागीदारीमुळे इंग्लंडने ३९१ धावा करत २७ धावांची आघाडी मिळवली.

भारतीय गोलंदाजांना पहिल्या सत्रात खूप संघर्ष करावा लागला, पण नंतर दुसऱ्या आणि तिसऱ्या सत्रात चांगले यश मिळाले. एकवेळ इंग्लंडचा संघ मोठी आघाडी घेईल असे वाटत होते, पण दिवसाच्या शेवटच्या चेंडूवर जेम्स अँडरसन बाद झाल्याने इंग्लंडचा डाव ३९१ वर संपुष्टात आला. यासह इंग्लंडकडे २७ धावांची आघाडीही राहिली. भारताने पहिल्या डावात ३६४ धावा केल्या होत्या.

दरम्यान, भारतीय गोलंदाजांमध्ये मोहम्मद सिराजने ९४ धावांत चार, तर ईशांत शर्माने ६९ धावांत तीन बळी घेतले. जसप्रीत बुमराहने सुरुवातीला फलंदाजांवर वर्चस्व गाजवण्याचा प्रयत्न केला, पण त्याला एकही विकेट मिळू शकली नाही. तसेच त्याने 13 नो बॉलही टाकले आहेत.