अनिल कुंबळेसाठी विरेंद्र सेहवागची 'बॅटिंग'

नवी दिल्ली: टीम इंडियाचा माजी प्रशिक्षक अनिल कुंबळेची निवड समितीच्या अध्यक्षपदी नेमणूक करावी, असं मत माजी सलामीवीर विरेंद्र सेहवागनं मांडलं. खेळाडूंमधील आत्मविश्वास वाढवण्याचा विशेष गुण कुंबळेकडे आहे. म्हणून तो या पदासाठी प्रबळ दावेदार आहे, असंही तो म्हणाला.

सेहवाग आपल्या रोखठोक वक्तव्यांमुळं कायम चर्चेत असतो. विविध मुद्द्यांवर 'चौफेर' फटकेबाजी करणाऱ्या सेहवागनं यावेळी अनिल कुंबळेसाठी जोरदार 'बॅटिंग' केली आहे. कुंबळेकडे निवड समितीच्या अध्यक्षपदाची धुरा द्यावी, असं तो म्हणाला. याशिवाय बीसीसीआयने मानधनातही वाढ करावी, अशी मागणी त्याने केली. कुंबळे हा निवड समितीच्या अध्यक्षपदासाठी योग्य उमेदवार आहे. खेळाडू म्हणून त्यानं सचिन तेंडुलकर, सौरभ गांगुली, राहुल द्रविड यांच्याशी संघाच्या रणनितीवर चर्चा केलेली आहे. प्रशिक्षक म्हणून युवा खेळाडूंना उत्तम प्रकारे मार्गदर्शन केलं आहे. २००७-०८ मध्ये ऑस्ट्रेलियाविरुद्धच्या मालिकेत मी कमबॅक केलं. त्यानंतर कुंबळे माझ्याकडे आला. पुढील दोन मालिका तरी खेळशील. तुला संघातून वगळण्यात येणार नाही असं त्यानं मला विश्वासानं सांगितलं. याच विश्वासाची खेळाडूंना गरज असते, असंही सेहवागनं सांगितलं.

कुंबळे यासाठी तयार होतील की नाही हे मी आता तरी सांगू शकत नाही. कारण निवड समितीच्या प्रमुखाला एका वर्षासाठी जवळपास एक कोटी रुपये मानधन दिले जाते. बीसीसीआयने या रकमेत वाढ करावी. त्यानंतर अनेक दिग्गज खेळाडू या पदावर काम करण्यास तयार होतील, असंही तो म्हणाला.