भारतीय संघाला अजून एक मोठा धक्का; महत्वाच्या खेळाडूला दुखापत, रोहित शर्माने दिले अपडेट्स

इंदूर : रवींद्र जडेजा आणि जसप्रीत बुमरानंतर भारतीय संघाला आता अजून एक मोठा धक्का बसला आहे. भारताचा कर्णधार रोहित शर्माने याबाबतचे अपडेट्स आता सर्वांना दिले आहेत.

रवींद्र जडेजा, जसप्रीत बुमरा आणि दीपक हुडा यांना यापूर्वी दुखापत झाली आहे. पण आता भारताच्या अजून एक खेळाडू दुखापतग्रस्त झाला आहे. दक्षिण आफ्रिकेविरुद्धच्या दुसऱ्या ट्वेन्टी-२० सामन्यात भारताच्या एका महत्वाच्या खेळाडूला दुखापत झाली आहे. त्यामुळे त्याला आता तिसऱ्या ट्वेन्टी़-२० सामन्यात संधी देण्यात आलेली नाही.

भारताच्या संघातून यावेळी अर्शदीप सिंगला संघाबाहेर ठेवण्यात आले आहे. त्याचबरोबर विराट कोहली आणि लोकेश राहुल यावेळी संघात नसतील. त्यामुळे या संघात आता मोहम्मद सिराज, श्रेयस अय्यर आणि उमेश यादव यांना संधी देण्यात आली आहे. रोहित शर्माने अर्शदीपच्या दुखापतीबाबत सांगितले की, "अर्शदीप सिंगच्या पाठिला दुखापत झाली आहे. त्यामुळे आता आम्ही त्याला खेळवण्याची जोखीम उचलणार नाही. त्यामुळे आम्ही त्याला आता तिसऱ्या ट्वेन्टी-२० सामन्यात संधी न देण्याचे ठरवले आहे. त्यामुळे आता काही काळ अर्शदीपला विश्रांती देण्यात येणार आहे."

आशिया चषक स्पर्धेत भारतीय संघाला रवींद्र जडेजाच्या रुपात मोठा धक्का बसला होता. कारण या मालिकेतील तिसऱ्या सामन्यानंतर तो खेळू शकला नाही आणि विश्वचषकालाही त्याला मुकावे लागले. त्यानंतर ही मालिका सुरु होण्यापूर्वी दीपक हुडा हा दुखापतग्रस्त असल्याचे समोर आले, त्यामुळे त्याला राष्ट्रीय क्रिकेट अकादमीमध्ये पाठवण्यात आले. या मालिकेतील पहिल्या सामन्यानंतर वेगवान गोलंगाज जसप्रीत बुमराला दुखापत झाल्याचे समोर आहे. आता बुमरा हा विश्वचषकात खेळणार नसल्याचे स्पष्ट झाले आहे. त्यानंतर आजच्या सामन्यानंतर भारताच्या अजून एक खेळाडूला दुखापत झाल्याची माहिती रोहित शर्माने दिली आहे. त्यामुळे भारतीय संघासाठी हा एक अजून मोठा धक्का असेल. त्यामुळे आता अर्शदीपची दुखापत कशा स्वरुपाची आहे आणि तो विश्वचषकात खेळू शकणार की नाही, याबाबतचे अपडेट्स बीसीसीआय कधी देणार याची उत्सुकता सर्वांना असेल.