वर्ल्ड चॅम्पियन न्यूझीलंडला धूळ चारत बांगलादेशचा ऐतिहासिक विजय, भन्नाट सेलिब्रेशनचा व्हिडीओ व्हाययरल...

BAN vs NZ : बे ओव्हल, माउंट मौनगानुई : ५ जानेवारी २०२२ चा दिवस बांगलादेशच्या क्रिकेट इतिहासात सुवर्णाक्षरांनी लिहून ठेवला जाईल. आजचा दिवस बांगलादेशी क्रिकेट चाहत्यांच्या मनातून कधीच पुसला जाणार नाही. त्याला कारणही तसंच आहे. कारण बांगलादेश क्रिकेट संघाने पहिल्यांदाच न्यूझीलंडचा कसोटी सामन्यात पराभव केला आहे. या शानदार विजयानंतर बांगलादेशच्या खेळाडूंनी ड्रेसिंग रूममध्ये जल्लोष केला. संपूर्ण संघ एकमेकांना मिठी मारून या विजयाचे सेलिब्रेशन करत होता.
यावेळी बांगलादेशी खेळाडू 'हम होंगे कामयाब'चे बंगाली व्हर्जन गाताना दिसले. बांगलादेशी क्रिकेट बोर्डाने आपल्या अधिकृत ट्विटर हँडलवरून हा व्हिडिओ पोस्ट केला आहे. हा व्हिडिओ शेअर करताना कॅप्शनमध्ये म्हटले आहे की, 'माउंट मौनगानुईत विजय मिळविल्यानंतर ड्रेसिंग रूममध्ये बांगलादेश संघ सेलिब्रेशन करत आहे.'

बांगलादेशचा ८ गडी राखून विजय
प्रथम फलंदाजी करताना न्यूझीलंडने ३२८ धावा केल्या. डेव्हन कॉन्वेने १२२ धावा केल्या. २०२२ मध्ये शतक झळकावणारा तो पहिला खेळाडू ठरला. प्रत्युत्तरात बांगलादेशने ४५८ धावा केल्या. मोमिनुल हकने २४४ चेंडूत ८८ धावा केल्या. याशिवाय लिटन दासने ८६ धावांची खेळी करत चांगली साथ दिली.

न्यूझीलंडचा संघ दुसऱ्या डावात १६९ धावांत गारद झाला. इबादत हुसेनने शानदार गोलंदाजी करताना ६ बळी घेतले. बांगलादेशसमोर विजयासाठी ४० धावांचे लक्ष्य होते. ते लक्ष्य त्यांनी दोन गडी गमावून पूर्ण केले. इबादत हुसेनला सामनावीर म्हणून गौरवण्यात आले. दोन कसोटी सामन्यांच्या मालिकेतील दुसरा सामना ९ जानेवारीपासून क्राइस्टचर्च येथे खेळवला जाणार आहे.

गेल्यावर्षी इंग्लंडमध्ये विश्व अजिंक्यपद स्पर्धेची अंतिम फेरी झाली होती. या अंतिम फेरीत न्यूझीलंडने भारतावर दणदणीत विजय मिळवला होता. त्यानंतर आतापर्यंत बऱ्याच दिगज्ज संघांना न्यूझीलंडने पराभूत केले आहे. पण बांगलादेशला मात्र त्यांना पराभूत करता आले नाही.वर्ल्ड चॅम्पियन न्यूझीलंडला पराभूत केल्यावर बांगलादेशच्या संघाने जोरदार सेलिब्रेशन केले. या सेलिब्रेशनचा व्हिडीओ सध्या चांगलाच व्हायरल झाला आहे.