महिला क्रिकेटपटूवर लैंगिक अत्याचार करणाऱ्या प्रशिक्षकाची हकालपट्टी

प्रशिक्षक हा खेळाडूंचा गुरु असतो. आपल्याकडील गुणवत्ता आणि अनुभवाच्या आधारे त्याने आपल्या शिष्यांना घडवायचे असते. पण एका भारतीय महिला क्रिकेटपटूवर प्रशिक्षकाने लैंगिक अत्याचार केल्याची घटना काही दिवसांपूर्वी घडली होती. या घटनेनंतर आता या प्रशिक्षकाची हकालपट्टी करण्याचा निर्णय घेण्यात आला आहे.

भारतीय संघाचे माजी क्रिकेटपटू अतुल बेदाडे यांच्यावर महिला क्रिकेटपटूबरोबर गैरप्रकार केल्याचे आरोप करण्यात आले होते. हा तपास करण्यासाठी एका समितीची स्थापनाही करण्यात आली होती. पण बेदाडे यांनी मात्र हे सर्व आरोप फेटाळून लावले आहेत.

या सर्व प्रकारानंतर बडोदा क्रिकेट मंडळाने बेदाडे यांच्यावर निलंबनाची कारवाई केली होती. पण आता त्यांच्यावरील निलंबन हटवण्यात आले आहे, पण त्यांना प्रशिक्षकपदावरून दूर करण्यात आले आहे. बडोदा क्रिकेट संघटनेचे सचिव अजित लेले यांनी ही माहिती पीटीआय या वृत्तसंस्थेला दिली आहे.

मार्च महिन्यामध्ये एका महिला क्रिकेटपटूने बेदाडे यांच्यावर लैंगिक शोषण आणि सार्वजनिक ठिकाणी आपला अपमान केल्याचे म्हटले होते. त्यानंतर या बाबत एक चौकशी समिती नेमण्यात आली. या चौकशी समितीने आज सांगितले की, बेदाडे यांना प्रशिक्षकपदावरून काढण्यात येत आहे, पण त्यांचे निलंबन कायम राहणार नाही. त्याचबरोबर यापुढे त्यांना बडोद्याच्या महिला संघाला मार्गदर्शनही करता येणार नाही. यापुढे अंजू जैन या बडोद्याच्या महिला क्रिकेट संघाचे प्रशिक्षकपद स्वीकारणार आहेत.