Video : सेमीफायनल जिंकण्यासाठी चक्क मैदानात उतरले प्रशिक्षक, शेवटच्या चेंडूवर घडला गोंधळ

नवी दिल्ली : बिग बॅश लीग २०२१-२२मध्ये सिडनी क्रिकेट मैदानावर गतविजेत्या सिडनी सिक्सर्स आणि अॅडलेड स्ट्रायकर्स यांच्यात खेळला गेला. रोमहर्षक ठरलेल्या या सामन्यात गतविजेत्या सिडनीने अॅडलेड स्ट्रायकर्सचा चार गडी राखून पराभव केला आणि अंतिम फेरी गाठली, पण सामन्यादरम्यान मैदानात एक विचित्र घटना पाहायला मिळाली. सिडनीच्या संघाला शेवटच्या चेंडूवर दोन धावांची गरज असताना संघाने फलंदाजी करणारा खेळाडू जॉर्डन सिल्क याला निवृत्त केले आणि संघाचे सहाय्यक प्रशिक्षक जे लँटन यांना मैदानात फलंदाजीसाठी धाडले. महत्त्वाच्या सामन्यात सिडनीने घेतलेल्या या निर्णयावर चोहोबाजूंनी टीका होत आहे.उपांत्य सामन्यापूर्वी सिडनीचा यष्टिरक्षक खेळाडू जोश फिलिपला कोरोनाची लागण झाल्याचे समोर आले होते. या परिस्थितीत संघाने सहाय्यक प्रशिक्षक जे लँटन यांचा प्लेइंग इलेव्हनमध्ये समावेश करण्याचा निर्णय घेतला होता. सपोर्टिंग स्टाफचा एखादा सदस्य खेळाडू म्हणून क्रिकेटच्या मैदानात उतरण्याची ही पहिलीच घटना नाही. याआधीही नियमित खेळाडू दुखापतीमुळे किंवा अन्य कारणांमुळे खेळत नसल्याने अनेकवेळा सपोर्टिंग स्टाफचे सदस्य मैदानात उतरले आहेत.

दरम्यान, सिडनीचा २९ वर्षीय खेळाडू जॉर्डन सिल्क क्षेत्ररक्षण करताना हॅमस्ट्रिंगचा शिकार झाला. दुखापतीमुळे तो महत्त्वाच्या सामन्यात वरच्या फळीऐवजी संघासाठी आठव्या क्रमांकावर फलंदाजीसाठी आला. यावेळी तो मैदानात धावांसाठी झगडताना दिसला. सिल्कची ही अडचण पाहून सिडनीच्या प्रशिक्षकाने सहाय्यक प्रशिक्षक जे लँटन यांना शेवटच्या चेंडू शिल्लक असताना फलंदाजीसाठी मैदानात उतरवले. संघाची ही रणनीतीही कामी आली आणि सिडनीतील हा सामना जिंकण्यातही ते यशस्वी ठरले.

शेवटच्या चेंडूवर सिडनी संघाने घेतलेल्या या निर्णयावर चोहोबाजूंनी टीका केली जात आहे. सिडनीचा हा निर्णय खेळाच्या विरोधात असल्याचे बोलले जात आहे. उपांत्य फेरीच्या सामन्याबद्दल बोलायचे झाले, तर सिडनी क्रिकेट ग्राउंडवर नाणेफेक गमावल्यानंतर अॅडलेडच्या संघाने प्रथम फलंदाजी करताना निर्धारित २० षटकात ४ बाद १६७ धावा केल्या. प्रतिस्पर्धी संघाने दिलेले १६८ धावांचे लक्ष्य सिडनी संघाने निर्धारित षटकात ६ गड्यांच्या मोबदल्यात १७० धावा करून पूर्ण केले. संघासाठी सलामीवीर हेडन केरने ५८ चेंडूंत १० चौकार आणि दोन षटकारांच्या मदतीने ९८ धावांचे सर्वोच्च नाबाद अर्धशतकी खेळी केली.