जुना ब्लेझर घालून सौरव गांगुली बीसीसीआय अध्यक्षपदाच्या खुर्चीत

मुंबई: भारतीय क्रिकेट संघाचे माजी कर्णधार सौरव गांगुली यांनी आज भारतीय क्रिकेट नियामक मंडळाचा (बीसीसीआय) कार्यभार स्वीकारला. बीसीसीआयच्या मुंबईतील मुख्यालयात झालेल्या सर्वसाधारण सभेत त्यांना अध्यक्षपदाची सूत्रे देण्यात आली. तेव्हा चर्चा होती ती गांगुली यांनी घातलेल्या जुन्या ब्लेझरची. या ब्लेझरनं सर्वांच्याच जुन्या आठवणींना उजाळा दिला.

धोनी चॅम्पियन; लवकर मैदान सोडणार नाही: सौरव

गांगुली यांची अध्यक्षपदी निवड आधीच झालेली असल्यानं आजचा सोहळा तसा औपचारिक होता. मात्र, गांगुली यांनी जुना ब्लेझर घातल्यानं हा सोहळा खास झाला. भारतीय क्रिकेट संघाच्या कर्णधारपदी निवड झाल्यानंतर गांगुली यांना मिळालेला हा ब्लेझर होता. त्या क्षणाची आठवण म्हणून त्यांनी हा घातला होता. खुद्द गांगुली यांनीच पत्रकारांना ही माहिती दिली. 'कर्णधार झाल्यानंतर मला हा ब्लेझर मिळाला होता. आजचा क्षणही माझ्यासाठी तितकाच खास होता. त्यामुळं मी हा ब्लेझर घालण्याचा निर्णय घेतला,' असं त्यांनी स्पष्ट केलं. 'हा ब्लेझर आता सैलसर झालाय,' अशी मिश्किल टिप्पणीही त्यांनी केली.

वाचा: सौरव गांगुलींनी स्वीकारला 'बीसीसीआय'च्या अध्यक्षपदाचा पदभार

भारतीय संघाचं कर्णधारपद भूषवलेल्या गांगुली यांची बीसीसीआयची अध्यक्षपदी निवड झाल्यानंतर त्यांनी व्यक्त केलेली प्रतिक्रिया बोलकी होती. 'भारतीय संघाचं नेतृत्व करण्यापेक्षा मोठी गोष्ट कुठलीही नाही. तो माझ्या जीवनातील सर्वाधिक गौरवाचा काळ होता,' असं त्यांनी म्हटलं होतं.
तब्बल ११ वर्षे आंतरराष्ट्रीय क्रिकेट गाजवल्यानंतर गांगुली यांनी निवृत्ती घेतली होती. गांगुली यांनी अध्यक्षपद स्वीकारताच सर्वोच्च न्यायालयानं नेमलेल्या प्रशासकीय समितीचा कार्यकाळ संपला आहे. आता बीसीसीआयचं सर्व कामकाज नवनिर्वाचित प्रतिनिधीच पाहणार आहेत.