झिम्बाब्वे दौऱ्यासाठी भारतीय संघात मोठा बदल, वॉशिंग्टन सुंदरच्या जागी मॅचविनर खेळाडूची निवड

नवी दिल्ली : झिम्बाब्वे दौऱ्यासाठी निवडण्यात आलेल्या भारतीय संघात आता एक मोठा बदल झाला आहे. या संघातील हा तिसरा बदल आहे. यावेळी अष्टपैलू वॉशिंग्टन सुंदरच्या जागी भारतीय संघात एका मॅचविनर खेळाडूची निवड झाली आहे.

वाचा-भारतीय संघ झिम्बाब्वेमध्ये दाखल; किती, कधी आणि कुठे सामने होणार जाणून घ्या...

सुंदर हा इंग्लंडमध्ये स्पर्धा खेळायला गेला होता आणि त्याला गंभीर दुखापत झाली. ही स्पर्धा संपवून तो झिम्बाब्वेच्या दौऱ्यासाठी रवाना होणार होता. पण या दुखापतीमुळे त्याला भारतीय संघातील स्थान गमवावे लागले आहे. त्यामुळे सुंदरच्या जागी आता कोणत्या खेळाडूला झिम्बाब्वेच्या दौऱ्यावर पाठवायचे, हा प्रश्न भारतीय निवड समितीला पडलेला होता. पण आता सुंदरच्या जागी एका मॅचविनर खेळाडूला संघात स्थान देण्यात आले आहे.

आयपीएलमध्ये आरसीबीकडून खेळताना शाहबाझ नदीमने दमदार कामगिरी केली होती. या कामगिरीच्या जोरावर आता नदीमला भारतीय संघात संधी देण्यात आली आहे. आयपीएलमध्ये खेळताना नदीमने चांगल्या धावाही केल्या होत्या आणि विकेट्सही मिळवले होते. त्यामुळे सुंदरच्या जागी तो चपखल बसत असल्याचे निवड समितीला वाटले आणि त्यामुळेच त्याची निवड आता भारतीय संघात करण्यात आली आहे. वॉशिंग्टन सुंदर वेगवेगळ्या फिटनेस समस्यांमुळे जवळपास १२ महिन्यांपासून अनेक वेळा संघाबाहेर पडला आहे. जानेवारीत ही त्याला कोरोनाची लागण झाल्याने तो संघाबाहेर झाला होता आणि आता पुन्हा त्याला दुखापतीला सामोरे जावे लागले आहे.

वाचा-भारत आणि झिम्बाब्वेचे वनडे सामने नेमके किती वाजता सुरु होणार, जाणून घ्या योग्य वेळ

भारत आणि झिम्बाब्वेतील सामने किती वाजता सुरु होणार, पाहा...
हा दौरा १८ ते २२ ऑगस्ट एवढ्या दिवसांचाच असेल. या मालिकेतील सर्व सामने दिवसाच खेळवण्यात येणार आहे. त्याचबरोबर भारतीयांसाठी या सामन्यांची वेळ योग्य आहे. कारण या सामन्यांची नाणेफेक दुपारी १२.१५ वाजता होणार आहे आणि त्यानंतर अर्ध्या तासाने हे सामने सुरु करण्यात येणार आहेत. वनडे सामने हे भारतीय वेळेनुसार दुपारी १२ वाजून ४५ मिनिटांनी सुरु होणार आहेत.

भारतीय संघ : लोकेश राहुल (कर्णधार), शिखर धवन (उपकर्णधार), ऋतुराज गायकवाड, शुभमन गिल, दीपक हुडा, राहुल त्रिपाठी, ईशान किशन, संजू सॅमसन, वॉशिंग्टन सुंदर, शार्दूल ठाकूर, कुलदीप यादव, अक्षर पटेल, आवेश खान, प्रसिध कृष्णा, मोहम्मद सिराज, दीपक चहर.