... असा रनआऊट तुम्ही आयुष्यात कधीच पाहिला नसेल; व्हिडिओ पाहून तुम्हालाही हसू आवरणार नाही

नवी दिल्ली : क्रिकेटमध्ये काहीवेळा अशा गोष्टी घडतात की, ज्याचा कोणीही विचार केलेला नसतो. सध्या अशीच एक गोष्ट पाहायला मिळाली आहे. यामध्ये एक फलंदाज अशा पद्धतीने रनआऊट झाला की, कोणीही या गोष्टीचा विचार कधीच केला नसेल.बांगलादेश प्रीमियर लीग २०२२ चा हंगाम शुक्रवारपासून सुरू झाला आणि पहिल्याच दिवशी दोन सामने खेळले गेले. खुलना टायगर्स (Khulna Tigers) आणि मिनिस्टर ग्रुप ढाका (Minister Group Dhaka) यांच्यात दिवसातील दुसरा सामना खेळला गेला. या सामन्यात एक अविश्वसनीय घटना पाहायला मिळाली. ज्याची सध्या चर्चा सुरू आहे.

वेस्ट इंडिजचा स्टार अष्टपैलू खेळाडू आंद्रे रसेल हा दुर्दैवीपणे धावबाद झाला आणि त्याचा पुरेपूर फायदा खुलना टायगर्सला मिळाला. पहिल्या डावातील १५ व्या षटकात हा प्रकार घडला. थिसारा परेरा गोलंदाजी करत होता. परेराने षटकातील शेवटचा चेंडू संथ गतीने टाकला, त्यावर रसेलने शॉर्ट थर्ड मॅनच्या दिशेने फटका मारून धाव घेण्याचा प्रयत्न केला.

शॉर्ट थर्ड मॅनवर उभ्या असलेल्या मेहदी हसनने स्ट्रायकर्स एंडवर थ्रो करण्याचा निर्णय घेतला, तेव्हा रसेलचा साथीदार महमुदुल्ला धावबाद होऊ नये म्हणून जोरात धावला. हसनचा थ्रो स्ट्रायकर्स एंडच्या स्टंपला लागला, तोपर्यंत महमुदुल्ला पोहोचला होता.

रसेल ठरला रन आऊटचा बळी
स्ट्रायकरच्या एंडच्या स्टंपवर चेंडू आदळल्यानंतर तो नॉन-स्ट्रायकर एंडच्या दिशेने गेला आणि तिथेही स्टंपवर आदळला. रसेलने आपण धावबाद होऊ शकतो, याची कसलीच कल्पना केली नसेल. नॉन-स्ट्रायकर एंडच्या दिशेने धावणारा रसेल क्रीजमध्ये येण्यापूर्वीच चेंडू स्टंपवर आदळला आणि तो धावबाद झाला. आंद्रे रसेल क्रीजच्या आत नसल्याने त्याला धावबाद देण्यात आले.

दरम्यान, खुलना टायगर्सने नाणेफेक जिंकून प्रथम गोलंदाजी करण्याचा निर्णय घेतला. तमीम इक्बाल (५०), मोहम्मद शहजाद (४२) आणि कर्णधार महमुदुल्लाह (३९) यांच्या खेळीमुळे मिनिस्टर ग्रुप ढाका संघाने निर्धारित २० षटकांत ६ गडी गमावून १८३ धावा केल्या. आंद्रे रसेल ७ धावांवर धावबाद झाला. प्रत्युत्तरात रॉनी तलुकदार (६१), आंद्रे फ्लेचर (४५) आणि थिसारा परेरा (३६*) यांच्या खेळीच्या जोरावर खुलना टायगर्सने १९ षटकांत ५ गड्यांच्या मोबदल्यात लक्ष्याचा यशस्वी पाठलाग केला.