कोणत्याही मैदानावर षटकार ठोकू शकतो : शिवम दुबे

तिरुवअनंतपुरम : वेस्ट इंडिजविरुद्धच्या दुसऱ्या टी-२० सामन्यात भारताला पराभवाचा सामना करावा लागला. पण या सामन्यात अष्टपैलू खेळाडू शिवम दुबेने केलेली फलंदाजी अविस्मरणीय ठरली. शिवम दुबेचे गगनचुंबी षटकार या सामन्यात प्रेक्षकांचं लक्ष वेधून घेत होते. आपण जगातील कोणत्याही मैदानावर षटकार ठोकू शकतो, असा विश्वास शिवम दुबेने व्यक्त केला. तिसऱ्या क्रमांकावर फलंदाजीसाठी आल्यानंतर त्याने ३० चेंडूत चार षटकारांच्या मदतीने ५४ धावा कुटल्या.

वेस्ट इंडिजचा भारतावर ८ गडी राखून विजय

भारताच्या पराभवामुळे टी-२० मालिका सध्या १-१ अशी बरोबरीत आहे. पदार्पणानंतर पहिल्याच आक्रमक खेळीनंतर शिवम दुबेने आनंद व्यक्त केला. तो म्हणाला, ‘हे मैदान जरा मोठं होतं, पण मी कोणत्याही मैदानावर षटकार ठोकू शकतो. तुम्ही हे पाहिलंच असेल आणि मी कुठेही त्यासाठी सक्षम आहे.’

भारतीय संघाने प्रथम फलंदाजी करताना ७ बाद १७० धावा केल्या. यानंतर वेस्ट इंडिजने ८ गडी राखून भारतावर विजय मिळवला. रोहित शर्माची फलंदाजीसाठी मदत झाल्याचं शिवम दुबेने सांगितलं. ‘तिसऱ्या क्रमांकावर फलंदाजीची संधी मिळणं मोठी बाब असते. निश्चितच माझ्यावर दबाव होता. यानंतर रोहितने सांगितलं की संयमाने आणि तुझ्या पूर्ण क्षमतेने खेळी कर. मला एका वरिष्ठ खेळाडूकडून याच पद्धतीच्या प्रेरणेची गरज होती. यानंतर मी षटकार ठोकला आणि अत्यंत सहज फलंदाजी केली’, असं दुबे म्हणाला.

विराटने पकडलेला झेल दर्शक पाहतच राहिले

भारतीय खेळाडूंकडून सुटलेले झेल हाही सामन्यातील चर्चेचा विषय राहिला. झेल सुटणं हा खेळाचाच भाग आहे, पण या चुकांमधून आम्ही निश्चितच शिकू, अशी प्रतिक्रिया दुबेने दिली. जे झेल सुटले ते दुर्दैवी होतं, पण कोणत्याही संघाकडून झेल सुटू शकतात. आपला सर्वोत्कृष्ट संघ आहे. हा सामना कठीण होता, पण पुढच्या सामन्यात निश्चितच कमबॅक करू, असा विश्वासही त्याने व्यक्त केला.