रोहित मुलासारखा, हार्दिक सोफ्यावर झोपलेला असतो; चेतन शर्मांच्या स्टिंगमध्ये सनसनाटी दावे

मुंबई: भारतीय क्रिकेट सध्या गोंधळलेल्या अवस्थेत पाहायला मिळत आहे. याच कारण म्हणजे बीसीसीआयचे मुख्य निवडकर्ता चेतन शर्मा हे एका स्टिंग ऑपरेशनचे शिकार झाले आहेत. झी न्यूजने केलेल्या एका स्टिंग ऑपरेशनमध्ये त्यांनी काही धक्कादायक गोष्टींचा खुलासा केला आहे. हा व्हिडिओ समोर आल्यानंतर भारतीय क्रिकेटमध्ये खळबळ उडाली. अलीकडेच त्यांना सलग दुसऱ्यांदा निवड समितीचे अध्यक्ष बनवण्यात आले.

या स्टिंग ऑपरेशनमध्ये, ५७ वर्षीय चेतन शर्मा, विराट-सौरव वाद, विराट-रोहित मतभेद आणि खेळाडूंमध्ये बनावट इंजेक्शन्सचा वापर यासारख्या बाबींवर खळबळजनक दावे करत आहे. आपण जे बोलतोय ते एका छुप्या कॅमेऱ्यात रेकॉर्ड होत आहे आणि संपूर्ण जग हे पाहत आहे, याची चेतन शर्मा यांना अजिबात कल्पना नव्हती.

'व्हॅलेंटाइन्स डे'ला पृथ्वी शॉकडून प्रेमाची कबुली, वाईफी म्हणत मैत्रिणीला टॅग केलं, पण इतक्यात...

रोहित माझ्या मुलासारखा

या स्टिंग ऑपरेशनमध्ये टीम इंडियाचा कर्णधार रोहित शर्मा त्यांच्याशी अर्धा तास फोनवर बोलत असल्याचे चेतन शर्मा म्हणाले. चेतन शर्मा म्हणले, 'रोहित माझ्या मुलासारखा आहे. निवडकर्त्यांची भूमिका मोठी आहे. खेळाडू निवडकर्त्यांच्या संपर्कात राहतात. आज सकाळी रोहित शर्मा माझ्याशी अर्धा तास बोलला. कोणता निवडकर्ता निवडीसाठी बसला आहे यावर हे अवलंबून आहे. मी एक वेगळ्या प्रकारचा व्यक्ती आहे. माझे साथीदार किंवा रोहित जे कोणी माझ्याशी बोलतात ते या खोलीच्या बाहेर जाणार नाही, याची मी काळजी घेतो.

हार्दिक घरी भेटायला येतो...

टी-२० संघाचा कर्णधार हार्दिक पांड्याबद्दल चेतन शर्मा यांनी सांगितलं की, तो घरी भेटायला येतो. चेतन यांच्या मते, 'हार्दिक हा भारतीय क्रिकेटचे भविष्य आहे. तो अतिशय नम्र आणि खूप चांगला क्रिकेटर आहे. सध्याचे काही क्रिकेटपटू मला भेटायला येतात. जसा हार्दिक आला होता. तो इथेच झोपून होता. दीपक हुडा नुकताच आला होता. उमेश यादव काही दिवसांपूर्वी भेटायला आला होता. खेळाडूंना अध्यक्षांशी चर्चा करायची असते. हार्दिक त्यादिवशी दिल्लीत उतरला, मला फोन केला सर तुम्ही कुठे आहात विचारले, मी म्हणालो मी घरी आहे, म्हणून तो रात्री आला कारण माझ्या घरात जी चर्चा घरात होऊ शकते ती इतर ठिकाणी कुठे होऊ शकत नाही.'

महिला IPLच्या पहिल्या लिलावात स्मृती मानधनावर कोटींची बोली; ठरली आतापर्यंतची सर्वात महाग खेळाडू

चेतन शर्मा तर पुरते अडकले

आता या स्टिंग ऑपरेशननंतर चेतन शर्मांचे काय होईल, हे येणारा काळच सांगेल. मीडिया एजन्सीशी झालेल्या संभाषणात बीसीसीआयच्या एका वरिष्ठ अधिकाऱ्याने सांगितले की, 'चेतन यांच्या भविष्याबद्दल सचिव जय शाह निर्णय घेतील. टी-२० कर्णधार हार्दिक पांड्या किंवा एकदिवसीय आणि कसोटी कर्णधार रोहित शर्मा हे अंतर्गत झालेल्या चर्चा उघड करू शकतात हे जाणून चेतनसोबत निवड बैठकीत बसायचे का, असा प्रश्न उपस्थित होतो.'