कार अपघातामध्ये क्रिकेट अंपायर रुडी कोर्टझेन यांचे निधन, घरी परतत असताना काळाचा घाला

नवी दिल्ली : हळुवारपणे बोट वर करून खेळाडूला बाद देण्यासाठी जगप्रसिद्ध असलेले माजी आंतरराष्ट्रीय क्रिकेट पंच रुडी कोर्टझेन यांचे कार अपघातामध्ये निधन झाले आहे, ते ७३ वर्षांचे होते. रुडी आपल्या काही मित्रांबरोबर गोल्फ खेळायला गेले होते. त्यावेळीच त्यांचा अपघात झाला. रुडी यांचे आपघातात निधन झाल्याची पुष्टी त्यांचे चिरंजीव रुडी कोर्टझेन जूनियर यांनी केली आहे.

रूडी यांच्या मुलाने सांगितले की, " रूडी हे नेल्सन मंडेला बे येथे गोल्फ खेळून परत येत असताना ही दुःखद घटना घडली. ते आपल्या काही मित्रांसह गोल्फ स्पर्धेत खेळण्यासाठी गेले होते आणि ते सोमवारी परत येण्याची अपेक्षा होती, परंतु हा निर्णय त्यांनी बदलला आणि या स्पर्धेतून घरी परतत असताना त्यांचा अपघात झाला. या अपघातामध्ये त्यांचे निधन झाले."

रूडी यांनी १९८१ साली पंचगिरीला सुरुवात केली होती. पण पहिला आंतरराष्ट्रीय सामन्यात पंचगिरी करण्यासाठी ते १९९२ साली उभे राहिले. भारत आणि दक्षिण आफ्रिका यांच्यातील पहिल्या आंतरराष्ट्रीय सामन्यात त्यांनी पंच म्हणून काम पाहिले होते. क्रिकेट विश्वात डिकी बर्ड आणि डेव्हिड शेफर्ड हे त्याकाळी दिग्गज पंच समजले जायचे. त्यानंतर रूडी यांनी क्रिकेट विश्वात पंचगिरी करताना आपला ठसा उमटवला. रूडी यांनी ३३१ आंतरराष्ट्रीय सामन्यांमध्ये पंचगिरी केली होती. स्टीव्ह बकनर यांच्यानंतर २०० कसोटी सामन्यात पंचगिरी करणारे ते दुसरे पंच ठरले होते.

आंतरराष्ट्रीय पंच अलीम दार यांनी श्रद्धांजली वाहिली. ते म्हणाले की, "त्याच्या कुटुंबासाठी आणि नंतर दक्षिण आफ्रिका व क्रिकेटसाठी ही सर्वात मोठी हानी आहे. मी त्याच्यासोबत अनेक सामन्यांमध्ये पंचगिरी केली आहे. ते केवळ एक चांगले पंच नव्हते तर एक उत्कृष्ट सहकारी देखील होते. रुडी हे मैदानावर नेहमीच खूप सहकार्य करणारे व्यक्ती होते. पण मैदानाबाहेर मदत करण्यास सदैव ते तत्पर असायचे. त्यांच्या वागणुकीमुळे खेळाडूंमध्येही आदर होता,"

दक्षिण आफ्रिकेचे माजी पंच मारायस इरास्मस म्हणाले, "रुडी शारीरिक आणि मानसिकदृष्ट्या एक व्यक्ती होते. त्यांनी दक्षिण आफ्रिकेच्या पंचांना जागतिक मंचावर जाण्याचा मार्ग मोकळा केला."