'श्रीवल्ली' या गाण्यावर डेव्हिड वॉर्नरचा भन्नाट डान्स; अल्लू अर्जुनकडून कौतुक, व्हिडीओ जगभरात व्हायरल

पुणे : दाक्षिणात्य चित्रपट अभिनेता अल्लू अर्जुनच्या पुष्पा या चित्रपटाची सध्या भारतातच नव्हे तर जगभरात चर्चा आहे. पुष्पा चित्रपटातील गाण्यांपासून ते संवादांपर्यंत अनेक व्हिडीओ सध्या ट्रेंडिंग आहेत. अलीकडेच वॉर्नरने 'पुष्पा' चित्रपटाच्या 'श्रीवल्ली' या गाण्यावरील हुक स्टेपचा व्हिडिओ अपलोड केला आहे, ज्याला प्रेक्षकांनी जोरदार पसंती दर्शवली आहे. वॉर्नरचा व्हिडीओ हा जगभरात चांगलाचच व्हायरल झाला आहे. डेव्हिड वॉर्नरच्या या व्हिडिओवर 'पुष्पा' चित्रपटातील प्रमुख अभिनेता अल्लू अर्जुननेही त्याचे कौतुक केले आहे. तसेच सनरायझर्स हैदराबादमधील त्याचे सहकारी श्रीवत्स गोस्वामी आणि खलील अहमद यांनीही प्रतिक्रिया नोंदवल्या आहेत. खलील अहमदने लिहिले आहे की, 'खूप चांगला प्रयत्न, भाऊ'.
तेलुगुसह हिंदी आणि इतर भाषांमध्येही पुष्पा हा चित्रपट रिलीज करण्यात आला असून याला तुफान प्रतिसाद मिळत आहे. लहानांपासून मोठ्यांपर्यंत सगळेच अल्लूचे फॅन्स बनले आहेत. ऑस्ट्रेलिया क्रिकेट संघातील स्टार फलंदाज डेव्हिड वॉर्नरही याला अपवाद नाही. अनेकदा तो त्याच्या इंस्टाग्रामवर मजेशीर पोस्ट टाकून चाहत्यांचे मनोरंजन करतो. भारतीय चित्रपटांचा मोठा चाहता असलेल्या वॉर्नरने नुकताच एक व्हिडिओ पोस्ट केला असून सध्या तो जोरदार व्हायरल होत आहे.

विराट कोहलीनेही या व्हिडिओवर केली मजेशीर कमेंट
डेव्हिड वॉर्नरला त्याच्या सोशल मीडिया हँडलवरून मजेदार पोस्ट शेअर करण्याची सवय आहे. आता त्याने शेअर केलेल्या 'पुष्पा' चित्रपटातील गाण्याच्या व्हिडिओवर भारताचा अनुभवी फलंदाज विराट कोहलीने एक मजेशीर प्रतिक्रिया नोंदवली आहे. विराटने वॉर्नरला विचारले की, 'तू बरा आहेस का?'

वॉर्नरने आतापर्यंत बऱ्याचवेळा भारतामधील प्रसिद्ध गाण्यांवर डान्स करत व्हिडीओ सोशल मीडियावर पोस्ट केले आहेत. वॉर्नरचे हे व्हिडीओ जगभरात चांगलेच प्रसिद्ध झाले असून सध्याच्या घडीला या व्हिडीओलाही भरघोस प्रतिसाद मिळत आहेत. भारतातील मनोरंजन क्षेत्राबरोबरच क्रिकेटपटूंनीही हा व्हिडीओ पाहिला आहे आणि त्याला चांगला प्रतिसादही दिला आहे. त्यामुळे आता या गाण्यानंतर वॉर्नरचा पुढचा व्हिडीओ कोणता असेल, याची उत्सुकता सर्वांना असेल.