दीपक चहरच्या पत्नीला शिवीगाळ व जीवे मारण्याची धमकी, १० लाखांचा धोका, जाणून घ्या प्रकरण

नवी दिल्ली : भारताचा वेगवान गोलंदाज दीपक चहरची पत्नी जया भारद्वाजला आता जीवे मारण्याची धमकी देण्यात आली आहे. १० लाख रुपयांचे हे प्रकरण असल्याचे आता समोर आले आहे. जयाने एका क्रिकेट संघटनेतील अधिकाऱ्याकडे १० लाखांची मागणी केली होती. त्यानंतर जयाला या अधिकाऱ्यांनी शिवीगाळ केली आणि त्यानंतर तिला जीवे मारण्याची धमकी दिली आहे.

नेमकं प्रकरण आहे तरी काय, जाणून घ्या...
दीपकची पत्नी जयाने हैदराबादमधील पारेख स्पोर्ट्सला १० लाख रुपये दिले होते. जया आणि पारेख स्पोर्ट्स यांच्यांमध्ये एक करार झाला होता. या करारानुसार जयाने पारेख स्पोर्ट्सला १० लाख रुपये दिले होते. हे आपले पैसे मागण्यासाठी जयाने जेव्हा विचारणा केली तेव्हा तिला पारेख स्पोर्ट्सचे मालक ध्रुव पारेख आणि कमलेश पारेख यांनी शिवीगाळ केली आणि त्यानंतर तिला जीवे मारण्याची धमकी दिल्याचे म्हटले गेले. या प्रकरणी दीपकच्या वडिलांनी आग्रा येथील हरीपर्वत पोलिस ठाण्यात गुन्हा दाखल केला आहे. यावेळी पारेख स्पोर्ट्सचे मालक ध्रुव पारेख आणि कमलेश पारेख यांच्याविरुद्ध तक्रार करण्यात आली आहे. ध्रुव आणि कमलेश यांचा हैदराबाद क्रिकेट संघटनेमध्ये अधिकारी आहेत. त्यामुळे आता हैदराबाद क्रिकेट संघटना यामध्ये काय भूमिका घेते, याकडे सर्वांचे लक्ष लागलेले असेल.

दीपक हा भारतासाठी एक अष्टपैलू खेळाडू म्हणून पुढे येत होता. आयपीएलमध्ये चेन्नई सुपर किंग्सकडून खेळत असताना त्याने बर मैदानात जयाला प्रपोज केले होते. जयाने लगेच त्याला होकार दिला होता. त्यानंतर या दोघांचे लग्न झाले. लग्न झाल्यावर दीपक मात्र जास्त काळ क्रिकेट खेळू शकला नाही. कारण लग्न झाल्यावर तो जेव्हा मैदानात परतला तेव्हा त्यालवा दुखापत झाली होती. ही दुखापत गंभीर असल्यामुळे तो टी-२० विश्वचषकही खेळू शकला नाही. पण आता तो चर्चेत आला आहे तो पत्नीला मिळालेल्या धमकीमुळे. त्यामुळे या प्रकरणात पुढे नेमकं काय होतं, याकडे चाहत्यांचे लक्ष असेल.