डब्लिन : भारताच्या संघात संधी मिळाल्यावर तिचे सोने कसे करायचे, याचा उत्तम वस्तुपाठ दीपक हुडाने दाखवून दिला. पहिल्या सामन्यात ऋतुराज गायकवाडला दुखापत झाल्यामुळे दीपक हुडाला सलामीला पाठवले आणि त्याने सर्वाधिक धावा केल्या होत्या. आता दुसऱ्या ट्वेन्टी-२० सामन्यात तर दीपकने वादळी फटकेबाजी केल्याचे पाहायला मिळाले. या तुफानी फटकेबाजीच्या जोरावर दीपकने ट्वेन्टी-२० क्रिकेटमधील आपले पहिले शतक झळकावले. त्याचबरोबर ट्वेन्टी-२० क्रिकेटमध्ये शतक झळकावणारा तो भारताचा चौथा खेळाडू ठरला. दीपकने यावेळी ५७ चेंडूंत ९ चौकार आणि सहा षटकारांच्या जोरावर १०४ धावांची नेत्रदीपक खेळी साकारली. दीपकला यावेळी धडाकेबाज फटकेबाजी करत संजू सॅमसनने सुयोग्य साथ दिली. दीपक आणि संजू यांच्या दमदार फटकेबाजीच्या जोरावर भारताला दुसऱ्या ट्वेन्टी-२० सामन्यात आयर्लंडपुढे २२५ धावांचा डोंगर उभारता आला. भारताने या सामन्यात पुन्हा एकदा नाणेफेक जिंकली. पण भारताचा कर्णधार हार्दिक पंड्याने यावेळी प्रथम फलंदाजी करण्याचा निर्णय घेतला. भारतीय संघ प्रथम फलंदाजीसाठी उतरला असला तरी त्यांना आश्वासक सुरुवात करता आली नाही.कारण तिसऱ्याच षटकात यावेळी भारताला इशान किशनच्या रुपात पहिला धक्का बसला. इशानला यावेळी फक्त तीन धावा करता आल्या. इशान बाद झाला असला तरी त्यानंतर दीपक आणि संजू यांची चांगलीच जोडी जमल्याचे पाहायला मिळाले. या दोघांनी यावेळी दुसऱ्या विकेटसाठी १७६ धावांची मोठी भागदारी रचली. ही भागीदारी सुरु असतानाच भारतीय संघ या सामन्यात मोठी धावसंख्या उभारणार हे स्पष्ट झाले होते. पण संजू बाद झाला आणि ही जोडी फुटली. संजूने या सामन्यात पुनरागमन करताना धमाकेदार फटकेबाजी केली. संजूने यावेळी ४२ चेंडूंत ९ चौकार आणि चार षटकारांच्या जोरावर ७७ धावांची दमदार खेळी साकारली. संजू बाद झाला असला तरी दीपक मात्र खेळपट्टीवर टिकून होता आणि त्याला साथ देण्यासाठी सूर्यकुमार यादव फलंदाजीला आला होता. सूर्याला फलंदाजीला आल्यावर लगेच फटेकबाजीला सुरुवात केली आणि आपले इरादे स्पष्ट केले. दीपकने १८व्या षटकाच्या पहिल्या चेंडूवर एकेरी धाव घेतली आणि आपले ट्वेन्टी-२० कारकिर्दीतील पहिले शतक झळकावले.
दीपक हुडाचे तुफानी शतक, आयर्लंडची धुलाई करत भारताने उभारला धावांचा डोंगर
भारताच्या दीपक हुडाने आयर्लंडविरुद्धचा दुसरा सामना चांगलाच गाजवला. पहिल्या सामन्यातही त्याने सर्वाधिक धावा केल्या होत्या. पण दुसऱ्या सामन्यात त्याची वादळी खेळी पाहायला मिळाली. दीपकने यावेळी ५५ चेंडूंत आपले शतक पूर्ण केले. भारताकडून ट्वेन्टी-२० क्रिकेटमध्ये शतक झळकावणारा दीपक हा चौथा खेळाडू ठरला आहे. दीपकला यावेळी संजू सॅमसनने ७७ धावांची खेळी साकारत चांगली साथ दिली.
हायलाइट्स:
- दीपक हुडाने साकारले तुफानी शतक
- भारताचा चौथा खेळाडू ठरला
- संजू सॅमसननेही साकारली ७७ धावांची दमदार खेळी