कसोटी क्रिकेटमध्ये नाणेफेक हवी कशाला?: डुप्लेसिस

जोहान्सबर्ग : पाच दिवसांच्या क्रिकेटमध्ये नाणेफेक हवी कशाला, हा मुद्दा पुन्हा एकदा चर्चेत आला आहे. यावेळी दक्षिण आफ्रिकेचा कर्णधार फाफ डुप्लेसिस याने या मुद्द्याला हात घातला आहे. भारताविरुद्धच्या तीन कसोटी सामन्यांच्या मालिकेत तिन्ही वेळा तो नाणेफेक हरला आणि त्याने कसोटीसाठी नाणेफेकीची गरजच काय, असा सवाल उपस्थित केला.

भारताने दक्षिण आफ्रिकेविरुद्धच्या कसोटी मालिकेत ३-० असे निर्भेळ यश संपादन केले. भारतीय संघाने आपल्याला सर्वच आघाड्यांवर पराभूत केल्याची कबुली फाफ डुप्लेसिसने दिली होती. पण, या तिन्ही सामन्यात नाणेफेक गमवावी लागल्याचे दुःखही त्याने बोलून दाखविले.

फाफ डुप्लेसिस म्हणतो की, तिन्ही सामन्यात भारताने नाणेफेक जिंकली आणि ५०० धावा केल्या. दिवसअखेरीस त्यांनी डाव घोषित केला आणि दिवसअखेरीस त्यांनी आमचे तीन फलंदाजही टिपले. तिसरा दिवस सुरू झाला तेव्हा आम्ही अडचणीत सापडलो. प्रत्येक कसोटीत हेच चित्र पाहायला मिळाले.

डुप्लेसिसचा नाणेफेक रद्द करण्यावर विश्वास आहे. जेव्हा एखादा संघ परदेश दौऱ्यावर कसोटी खेळण्यासाठी जातो, तेव्हा त्यांना चुरशीची लढत खेळता, यावी यासाठी नाणेफेक रद्दच व्हायला हवी.

दक्षिण आफ्रिकेच्या पराभवाबद्दल पत्रकारांशी बोलताना तो म्हणतो की, माजी खेळाडूंनी क्रिकेटच्या हितासाठी पुढाकार घ्यायला हवा. माजी खेळाडूंचा जास्तीत जास्त वापर करून घेता यायला हवा. अर्थात, आर्थिक बाबी हा मोठा अडथळा आहे. आम्हाला अनुभवाची गरज आहे आणि तो माजी खेळाडूंकडूनच आम्हाला मिळू शकतो.