महिनाभर करोनाशी लढणाऱ्या भारताच्या दिग्गज क्रिकेटपटूंची प्रकृती चिंताजनक

गेल्या महिन्याभरापासून भारताचे एक दिग्गज क्रिकेटपटू करोनाशी लढत आहेत. पण आता त्यांची प्रकृती चिंताजनक असल्याचे म्हटले जात आहे. त्यांच्या शरीरातील विविध अवयव निकामी होत असल्याचे समजते आहे. त्यामुळे आता त्यांना व्हेंटिलेटरवर ठेवलेले आहे.

भारताचे माजी सलामीवीर चेतन चौहान यांची प्रकृती अत्यावस्थ आहे. महिन्याभरापूर्वी त्यांना करोनाची लागण झाली होती. त्यामुळे त्यांना हॉस्पिटलमध्ये दाखल करण्यात आले होते. पण आता त्यांची प्रकृती बिघडत चालली असून त्यांचे अवयव आता निकामी होत असल्याचे पाहायला मिळत आहे. भारताचे माजी महान क्रिकेटपटू सुनील गावस्कर यांच्याबरोबर चेतन चौहान हे सलामीला यायचे. गावस्कर आणि चौहान ही जोडी क्रिकेट विश्वामध्ये चांगलीच प्रसिद्ध होती.


करोनाची बाधा झाल्यानंतर चौहान यांना १२ जुलैला लखनऊ येथील संजय गांधी रुग्णालयात दाखल करण्यात आले होते. महिन्याभरात त्यांच्या प्रकृतीमध्ये जास्त सुधारणा झालेली पाहायला मिळाली नाही. चौहान हे उत्तर प्रदेश सरकारमध्ये कॅबिनेट मंत्री असून त्यांचे वय ७३ वर्षे आहे.

चौहान यांच्या प्रकृतीची माहिती दिल्ली क्रिकेट संघटनेच्या एका अधिकाऱ्याने दिली आहे. त्यांनी सांगितले की, " चौहान यांची किडनी आज सकाळी निकामी झाल्याचे समजले. त्याचबरोबर त्यांचे विविध अवयव निकामी होत चालले आहेत. चौहान यांना करोना झाला होता. त्यामुळे त्यांना १२ जुलैला संजय गांधी रुग्णालयात दाखल करण्यात आले होते. पण गेल्या महिन्याभरात त्यांची प्रकृती ही ढासळत चालल्याचे पाहायला मिळत आहे. त्यामुळे आता त्यांना व्हेंटिलेटरवर ठेवण्यात आले आहे."


चौहान हे भारताकडून ४० कसोटी सामने खेळले आहेत. भारताचे एक दमदार सलामीवीर अशी त्यांची ओळख होती. सुनील गावस्कर यांच्याबरोबर सलामीला येताना चौहान यांनी चांगल्या धावाही केल्या होत्या. त्याचबरोबर त्यांनी भारतीय संघाच्या व्यवस्थापकाची भूमिकाही सांभाळली होती. भारतीय संघ जेव्हा ऑस्ट्रेलियाच्या दौऱ्यावर गेला होता, तेव्हा ते भारतीय संघाचे व्यवस्थापक होते. त्याचबरोबर दिल्ली क्रिकेट संघटनेचे अध्यक्षपदही त्यांनी भूषवलेले होते.