हार्दिक पंड्यावर शस्त्रक्रिया; ५ महिने मैदानाबाहेर राहणार?

नवी दिल्ली: भारतीय क्रिकेट संघातील अष्टपैलू खेळाडू हार्दिक पंड्या याच्यावर लंडनमध्ये शस्त्रक्रिया करण्यात आली आहे. पाठीच्या खालच्या भागाला जबर इजा झाल्यामुळं ही शस्त्रक्रिया करावी लागली असून त्यामुळं पुढील किमान पाच महिने त्याला क्रिकेटच्या मैदानापासून दूर राहावे लागण्याची चिन्हे आहेत.

शस्त्रक्रिया यशस्वी झाल्यानंतर हार्दिकनं ट्विटरवर एक फोटो शेअर केला आहे. फोटोमध्ये तो हॉस्पिटलच्या बेडवर दिसतोय. 'माझ्यावरील शस्त्रक्रिया यशस्वी झालीय. तुम्हा सर्वांच्या सदिच्छांबद्दल आभार!! टीम इंडियामध्ये पुनरागमनासाठी किती वेळ लागेल मला माहीत नाही. मात्र, तोपर्यंत तुम्ही मला विसरू नका,' असं त्यानं म्हटलं आहे.
मागील वर्षीच्या सप्टेंबरमध्ये यूएईत झालेल्या आशिया कप स्पर्धेत खेळताना एका सामन्यादरम्यान हार्दिकच्या पाठीला दुखापत झाली होती. त्यातून तो बरा झाला आणि २०१९ च्या विश्वचषकात खेळलाही. मात्र, आफ्रिकेविरुद्ध झालेल्या टी-२० मालिकेदरम्यान त्याच्या पाठीच्या दुखण्यानं पुन्हा डोकं वर काढलं. त्यामुळं भारत-दक्षिण आफ्रिकेमध्ये सध्या सुरू असलेल्या कसोटी मालिकेत हार्दिकचा समावेश करण्यात आला नाही. आता शस्त्रक्रिया झाल्यामुळं नोव्हेंबरपासून बांगलादेश विरोधात होणाऱ्या आगामी टी-२० मालिकेलाही त्याला मुकावं लागणार आहे.

भारत x दक्षिण आफ्रिका कसोटी सामन्याचे स्कोअरकार्ड

गेल्या काही दिवसांपासून टीम इंडियाच्या खेळाडूंना दुखापतींचा सामना करावा लागत आहे. त्यामुळं संघाच्या कामगिरीवरही परिणाम होताना दिसत आहे. टीम इंडियाचा स्टार गोलंदाज जसप्रीत बुमराह हा देखील सध्या दुखापतीमुळं मैदानाबाहेर आहे.

वाचा: अश्विनला एकाकी पाडले; सुनील गावस्करांचा आरोप