इजा, बिजा, तिजा... भारतीय संघाला बसला तिसरा धक्का, रोहित शर्माने अखेर चुक मान्य केली अन्...

मिरपूर : पराभवासहीतभारतीय संघाला आता तिसरा मोठा धक्का बसला आहे. पहिल्या वनडेत भारताचा पराभव झाला, त्यानंतर रिषभ पंत आता या मालिकेत खेळणार नसल्याचे बातमी मिळाली. त्यामुळे भारतीय संघासाठी हा दुष्काळात तेरावा महिना असल्याचे आता समोर आले आहे. कारण भारतीय संघाला आता तिसरा धक्का बसल्याचे समोर आले आहे.

रविवारी मीरपूर येथे बांगलादेशविरुद्धच्या पहिल्या एकदिवसीय सामन्यात षटकांची गती संथ राखल्याबद्दल भारतीय संघाला दंड ठोठावला गेला आहे. भारतीय संघाला आता त्यांच्या सामन्याच्या मानधनाच्या ८० टक्के रक्कम दंड स्वरुपात द्यावी लागणार आहे. या सामन्यासाठी रंजन मदुगले यांच्याकडे सामनाधिकारी पदाची जबाबदारी देण्यात आली होती आणि त्यांनी हा निर्णय घेतला आहे.

पहिल्या वनडे सामन्यात निर्धारीत वेळेपेक्षा भारतीय संघाने यावेळी चार षटके उशिरा टाकली. त्यामुळे भारतीय संघावर ही कारवाई करण्यात आली. आयसीसीच्या नियमानुसार जर निर्धारीत वेळेपेक्षा एक षटक कमी टाकले तर सामन्याच्या २० टक्के मानधन दंड स्वरुपात कापले जाते. भारताने या सामन्यात चार षटके उशिरा टाकली, त्यामुळे भारतीय खेळाडू, कर्णधार, सपोर्ट स्टाफ यांच्या मानधनातील ८० टक्के रक्कम कापली जाणार आहे.

आपल्याकडून चुक झाल्याचे रोहित शर्मा यावेळी मान्य केले आहे. त्यामुळे या प्रकरणाची औपचारीक सुनावणी करण्यात आली नाही. जर रोहित शर्माने ही चूक मान्य केली नसती तर या प्रकरणाची चौकशी झाली असती. या प्रकरणी रोहितचे म्हणणे नेमके काय आहे, हे पहिल्यांदा ऐकले गेले असते. पण सामना संपल्यावर काही वेळात जेव्हा सामनाधिकारी रंजन मदुगले यांनी रोहित शर्माला या चुकीबाबत सांगितले. रोहितने ही चूक तात्काळ मान्य केली. त्यामुळे या प्रकरणी कोणतीही कारवाई औपचारीक सुनावणी करण्यात आली नाही. पहिल्या सामन्यात भारतीय संघाला विजयाची सुवर्णसंधी होती. भारताला फक्त एकच विकेट मिळवायचा होता. पण भारतीय संघाने यावेळी दोन झेल सोडले आणि त्यांच्या हातून हा सामना निसटल्याचे पाहायला मिळाले.