टी-२० मालिकेसाठी न्यूझीलंडचा नवा कर्णधार, मॅचविनर खेळाडू ठरणार भारतासाठी डोकेदुखी

रांची : वनडे मालिकेत न्यूझीलंडला भारताकरून सपाटून मार खावा लागला होता. कारण वनडे मालिकेत न्यूझीलंडला भारतापुढे लोटांगण घालावे लागले होते. पण आता टी-२० मालिकेत न्यूझीलंडचा कर्णधार बदलला आहे. एका मॅचविनर खेळाडूला आता न्यूझीलंडचे नेतृत्व करायची संधी मिळणार आहे.

टॉम लॅथमकडे वनडे मालिकेचे नेतृत्व सोपवण्यात आले होते. पण लॅथमच्या नेतृत्वाखाली भारताने एका सामन्यात न्यूझीलंडचा १०८ धावांवरच खुर्दा उडवला होता. अन्य दोन सामन्यांमध्ये भारताने धावांचा डोंगर उभारत विजय साकारले होते. न्यूझीलंडला या मालिकेत काहीच करता आले नव्हते. पण आता टी-२० मालिकेत मात्र नवा गडी संघाचे नेतृत्व करणार आहे. त्यामुळे हा नवा कर्णधार संघाचे नवं राज्य आणण्याच्या तयारीत आहे.

न्यूझीलंडसाठी आतापर्यंत मॅचविनर ठरला आहे तो अष्टपैलू मिचेल सँटनर. मिचेल हा चांगला फिरकीपटू तर आहेच, पण तो धडाकेबाज फलंदाजीही करू शकतो. भारताविरुद्धच्या पहिल्या वनडे सामन्यात मिचेलने अर्धशतक झळकावत भारताच्या गोलंदाजीचा चांगलाच समाचार घेतला होता. त्यामुळे गोलंदाजी असो की फलंदाजी सँटनर हा न्यूझीलंडसाठी कसाही सामना फिरवू शकतो. भारताविरुद्धच्या मालिकेसाठी सँटनरकडे भारताचे नेतृत्व आहे. त्याचबरोबर न्यूझीलंडच्या टी-२० संघात बरेच बदलही करण्यात आले आहेत. त्यामुळे आता वनडे मालिका गमावली असली तरी न्यूझीलंड टी-२० मालिका जिंकणार का, याकडे सर्वांचे लक्ष लागलेले असेल.

टी-२० मालिकेसाठी दोन्ही संघ
भारत : हार्दिक पंड्या (कर्णधार), सूर्यकुमार यादव (उपकर्णधार), इशान किशन (यष्टीरक्षक), शुभमन गिल, पृथ्वी शॉ, दीपक हुडा, राहुल त्रिपाठी, जितेश शर्मा (यष्टीरक्षक), वॉशिंग्टन सुंदर, कुलदीप यादव, युजवेंद्र यादव चहल, अर्शदीप सिंग, उमरान मलिक, शिवम मावी, मुकेश कुमार.

न्यूझीलंड: मिचेल सँटनर (कर्णधार), फिन ऍलन, मायकेल ब्रेसवेल, मार्क चॅपमन, डेव्हॉन कॉनवे (यष्टीरक्षक), डेन क्लीव्हर (यष्टीरक्षक), जेकब डफी, लॉकी फर्ग्युसन, बेंजामिन लिस्टर, डॅरिल मिशेल, ग्लेन फिलिप्स (यष्टीरक्षक), मायकेल रिप्पन , हेन्री शिपले, ईश सोधी आणि ब्लेअर टिकनर.