INDvsNZ : राहुल द्रविडने टीम इंडियात पुन्हा सुरू केली जुनी परंपरा; पाहा व्हिडिओ

कानपूर : महान फलंदाज आणि भारतीय क्रिकेट संघाचे माजी कर्णधार सुनील गावस्कर यांनी गुरुवारी (२५ नोव्हेंबर) श्रेयस अय्यरला भारताची 'टेस्ट कॅप' दिली. अशा प्रकारे भारतीय क्रिकेटच्या दिग्गजांकडून नवीन खेळाडूंना ही प्रतिष्ठित कॅप देण्याची जुनी परंपरा मुख्य प्रशिक्षक राहुल द्रविड यांनी पुन्हा सुरू केली आहे. भारताकडून कसोटी क्रिकेटमध्ये पदार्पण करणारा श्रेयस अय्यर हा ३०३ वा खेळाडू ठरला आहे. नाणेफेक होण्याआधी गावस्कर यांनी अय्यरला कॅप दिली. या खास कार्यक्रमासाठी द्रविडने गावस्कर यांना आमंत्रित केले होते. यापूर्वी टी-२० मालिकेदरम्यानही द्रविडने हर्षल पटेलकडे राष्ट्रीय संघाची कॅप सोपवण्यासाठी मर्यादीत षटकाच्या क्रिकेटमधील भारताचा सर्वात यशस्वी गोलंदाजांपैकी एक असलेल्या अजित आगरकरला बोलावले होते.

वाचा- Live: पदार्पणाच्या कसोटीत श्रेयस अय्यरचा धमाका, संघाला संकटातून बाहेर काढले

माजी खेळाडूंकडून राष्ट्रीय संघाची कॅप घेण्याची ऑस्ट्रेलियाची परंपरा आहे. या अंतर्गत शेन वॉर्न, मार्क वॉ, मार्क टेलर, अॅडम गिलख्रिस्ट यांसारखे दिग्गज नवीन खेळाडूंना ऑस्ट्रेलियाची बॅगी ग्रीन हॅट देत असत. भारतातही अशी परंपरा होती, पण काही काळ फक्त कर्णधार किंवा वरिष्ठ खेळाडू किंवा सपोर्ट स्टाफमधील सदस्य पदार्पण करणाऱ्याला कॅप देत असत. द्रविड स्वतःला परंपरावादी मानतो. अय्यरला कसोटी कॅप देण्यासाठी त्याने सुनील गावस्कर यांना बोलावले होते. कॅप देताना गावस्कर यांनी अय्यरलाही कानमंत्र दिला. कसोटी संघाच्या नव्या फलंदाजाने तो लक्षपूर्वक ऐकला. आणि नंतर टोपी घेत तिचे चुंबन घेतले.

वाचा- कोण आहे मोहक कुमार? १२५ चेंडूत ३० षटकार आणि २८ चौकारांसह केल्या इतक्या धावा



वाचा-भारतीय क्रिकेटपटूला ISIS कश्मीरकडून जीवे मारण्याची धमकी; २४ तासात दुसऱ्यांदा दिला...

अय्यरसाठी उघडले दार
के.एल. राहुल दुखापतग्रस्त झाल्याने श्रेयस अय्यरला पदार्पणाची संधी मिळाली आहे. त्याची दुसऱ्यांदा भारतीय कसोटी संघात निवड झाली आहे. यापूर्वी २०१७ मध्ये ऑस्ट्रेलियाविरुद्धच्या मालिकेतील शेवटच्या सामन्यात तो विराट कोहलीचा बदली खेळाडू म्हणून आला होता. विशेष म्हणजे त्यावेळीही अजिंक्य रहाणेच संघाचा कर्णधार होता. तर कर्नाटकातून आलेला अनिल कुंबळे संघाचा मुख्य प्रशिक्षक होता. आताही मूळचा कर्नाटकचा असलेला राहुल द्रविड संघाचा मुख्य प्रशिक्षक आहे. धरमशाला येथे झालेल्या त्या कसोटीत रहाणेने एका अतिरिक्त गोलंदाजाला खेळविण्याचा निर्णय घेतला, त्यामुळे अय्यरला पदार्पण करता आले नाही.

वाचा- IND vs NZ Kanpur: भारत-न्यूझीलंड सामन्यात 'पाकिस्तान मुर्दाबाद'च्या घोषणा; जाणून घ्या

२६ वर्षीय श्रेयस अय्यर मुंबईच्या संघातून देशांतर्गत क्रिकेट खेळतो. गेल्या चार वर्षांपासून तो भारतीय संघाचा महत्वाचा भाग आहे. यादरम्यान तो सतत एकदिवसीय आणि टी-२० क्रिकेट खेळत आहे, पण त्याला कसोटीत संधी मिळाली नव्हती.