लोकेश राहुलला कर्णधारपद मिळालं; पण ओपनिंग करायला का मिळणार नाही, जाणून घ्या कारण...

नवी दिल्ली : लोकेश राहुलला झिम्बाम्बेच्या दौऱ्यासाठी कर्णधारपद मिळाले आहे. पण तरीही राहुलला या दौऱ्यात सलामी करायला मिळणार नाही, असे चित्र दिसत आहे.

वाचा-भारत आणि झिम्बाब्वेचे वनडे सामने नेमके किती वाजता सुरु होणार, जाणून घ्या योग्य वेळ

झिम्बाब्वेच्या दौऱ्यासाठी शिखर धवनकडे पहिल्यांदा कर्णधारपद देण्यात आले होते. पण त्यानंतर लोकेश राहुल फिट झाला आणि त्याला संघात स्थान देण्यात आले. यावेळी राहुलला फक्त संघात स्थान दिले नाही तर त्याच्याकडे भारताचे कर्णधारपदही देण्यात आले. पण राहुलकडे कर्णधारपद आले असले तरी त्याला सलामीला मात्र यावेळी येता येणार नसल्याचे संकेत मिळत आहेत.

धवनकडे आता उपकर्णधापद असले तरी त्याचे या संघातील सलामीवीराचे स्थान पक्के आहे. कारण सलामी सोडून अन्य कोणत्याही ठिकाणी त्याने फलंदाजी केलेली नाही. त्याचबरोबर संघात ऋतुराज गायकवाड आणि शुभमन गिल हे दोन युवा सलामीवीर आहेत. या दोघांनीही आतापर्यंत सलामी सोडून दुसऱ्या स्थानावर जास्त फलंदाजी केलेली नाही. यावेळी फक्त लोकेश राहुलच अशी एक व्यक्ती आहे की त्याने आतापर्यंत बऱ्याच स्थानांवर फलंदाजी केलेली आहे. या मालिकेत शिखर धवनबरोबर राहुल सलामीला येऊ शकतो, पण त्यामुळे दोन्ही सलामीवीर संघाबाहेर राहतील. त्याचबरोबर राहुल जर मधल्या फळीत खेळला तर संघाला बळकटी मिळू शकेल. त्यामुळे राहुल चौथ्या किंवा पाचव्या स्थानावर फलंदाजीला येऊ शकतो. त्यामुळे आता धवनबरोबर सलामीला ऋतुराज आणि शुभमन यांच्यापैकी कोणाला पाठवायचे, हा निर्णय भारताच्या संघ व्यवस्थापनाला घ्यावा लागणार

भारत आणि झिम्बाब्वेतील सामने किती वाजता सुरु होणार, पाहा...
हा दौरा १८ ते २२ ऑगस्ट एवढ्या दिवसांचाच असेल. या मालिकेतील सर्व सामने दिवसाच खेळवण्यात येणार आहे. त्याचबरोबर भारतीयांसाठी या सामन्यांची वेळ योग्य आहे. कारण या सामन्यांची नाणेफेक दुपारी १२.१५ वाजता होणार आहे आणि त्यानंतर अर्ध्या तासाने हे सामने सुरु करण्यात येणार आहेत. वनडे सामने हे भारतीय वेळेनुसार दुपारी १२ वाजून ४५ मिनिटांनी सुरु होणार आहेत.

वाचा-झिम्बाब्वे दौऱ्यासाठी भारतीय संघात मोठा बदल, वॉशिंग्टन सुंदरच्या जागी मॅचविनर खेळाडूची निवड

भारतीय संघ : लोकेश राहुल (कर्णधार), शिखर धवन (उपकर्णधार), ऋतुराज गायकवाड, शुभमन गिल, दीपक हुडा, राहुल त्रिपाठी, ईशान किशन, संजू सॅमसन, शाहबाझ नदीम, शार्दूल ठाकूर, कुलदीप यादव, अक्षर पटेल, आवेश खान, प्रसिध कृष्णा, मोहम्मद सिराज, दीपक चहर.