असे काय झाले की, टीम इंडियाचे ४ जण भारताविरुद्ध खेळणार; जाणून घ्या

बर्मिंघम: भारतीय क्रिकेट संघ सध्या इंग्लंड दौऱ्यावर आहे. रोहित शर्माच्या नेतृत्वाखाली टीम इंडिया एक कसोटी, ३ वनडे आणि ३ टी-२० सामने खेळणार आहेत. गेल्या वर्षी पाच कसोटी सामन्यांच्या मालिकेतील अखेरची कसोटी आता १ जुलै रोजी सुरू होत आहे.

इंग्लंडविरुद्धच्या मुख्य दौऱ्याला सुरूवात होण्याआधी टीम इंडिया एक सराव सामना खेळणार आहे. ही लढत गुरुवारी म्हणजे आज २३ जूनपासून सुरू होईल. भारताची लढत लिसेस्टरशायरविरुद्ध होणार आहे. या सामन्यात टीम इंडियाचे चार खेळाडू आपल्याच देशाविरुद्ध मॅच खेळणार आहेत.

वाचा- आयपीएलचं कर्णधारपद गेलं, पण कसोटी सामन्यापूर्वी रवींद्र जडेजासाठी आली गूड न्यूज...

भारतीय संघ ज्या लिसेस्टरशायरविरुद्ध मैदानात उतरणार आहे त्या संघाकडून भारताचे चेतेश्वर पुजारा, ऋषभ पंत, जसप्रीत बुमराह आणि प्रसिद्ध कृष्णा हे चार खेळाडू खेळणार आहेत. सराव सामन्यात भारताचे नेतृत्व रोहित शर्माच करणार आहे. चार दिवसाच्या या लढतीत दोन्ही संघाकडून प्रत्येकी १३ खेळाडू खेळतील जेणेकरून गोलंदाजांवर अधिक वर्कलोड येणार नाही.

वाचा- क्रिकेटचे रुप बदलणार; सहा विकेट्सनंतर ऑलआऊट, पुरुष-महिला एकत्रित लढणार अन् बरंच काही

इंग्लंडमधील काउंटी क्रिकेट क्लब लिसेस्टरशायर (LCCC)ने म्हटले आहे की, वॉर्म-अप मॅचसाठी आम्ही टीम इंडियाचे स्वागत करतो. पुजारा, पंत, बुमराह आणि कृष्णा हे चार जण आमच्या क्लबकडून खेळतील. संघाचे नेतृत्व सॅम इवांस करतील. भारतीय खेळाडूंनी क्लबकडून खेळावे यासाठी बीसीसीआय, इंग्लंड क्रिकेट बोर्डाची परवागी घेतली आहे. यामुळे सर्व भारतीय खेळाडूंना सराव सामना खेळण्याची संधी मिळेल.