IND vs BAN : विराट कोहलीला मोठा विक्रम मोडण्याची संधी, फक्त करावं लागेल हे छोटसं काम

नवी दिल्ली : न्यूझीलंडसोबतच्या वनडे मालिकेत भारताचा १-० ने पराभव झाला. आता भारतीय संघ बांगलादेश विरुद्ध तीन वनडे सामन्यांची मालिका खेळणार आहे. मालिकेसाठी बांगलादेशचा संघ भारतात दाखल झाला आहे. भारत-बांगलादेशमधील पहिला वनडे सामना ४ डिसेंबरला म्हणजे उद्या रविवारी होणार आहे. सामन्यापूर्वी भारतीय संघाने आज जोरदार सराव केला. ही मालिका भारतीय संघासाठी महत्त्वाची आहे. भारताचा स्टार खेळाडू विराट कोहली याला रिकी पॉन्टींगचा विक्रम मोडण्याची मोठी संधी आहे.

आंतरराष्ट्रीय क्रिकेटमध्ये विराट कोहलीने आतापर्यंत ७१ शतकं झळकावली आहेत. आशिया कपमध्ये अफगाणिस्तान विरोधात विराटने ७१वे शतक झळकावले होते. यावेळी विराट कोहलीने रिकी पॉन्टींगच्या आंतरराष्ट्रीय शतकांची बरोबरी केली होती. आता विराट कोहलीने बांगलादेशविरोधात शतक झळकावले तर तो पॉन्टींगच्याही पुढे जाईल. मग विराट कोहलीच्या पुढे फक्त मास्टर ब्लास्टर सचिन तेंडुलकरच असेल. सचिन तेंडुलकरचा आंतरराष्ट्रीय क्रिकेटमध्ये १०० शतकांचा विक्रम आहे.

विराट कोहलीची बांगलादेशविरोधातील कामगिरीही चमकदार आहे. बांगलादेशविरोधात वनडेमध्ये विराटची सर्वोत्तम कामगिरी १३६ धावांची आहे. बांगलादेशविरोधात त्यांच्याच देशात विराटने वनडेमध्ये ३ शतकं आणि तीन अर्ध शतकं झळकावली आहेत. बांगलादेशविरोधात सर्वाधिक धावा करणाऱ्या भारतीय क्रिकेटपटूंमध्ये आघाडीवर आहे.

भारत-बांगलादेश मालिकेचे वेळापत्रक

भारत आणि बांगलादेशमधील वनडे मालिकेतील तीन सामने हे ४, ७ आणि १० डिसेंबरला होणार आहेत. यानंतर दोन्ही संघांमध्ये कसोटी मालिकाही खेळवली जाणार आहे. कसोटी मालिकेतील पहिला सामना हा १५ डिसेंबरला आणि दुसरा सामना २२ डिसेंबरला खेळवला जाणार आहे. यात रोहित शर्मा हा भारतीय संघाचा कर्णधार असेल.

Ind vs Ban Odi: आता बॅटिंग कशी करायची? बांगलादेशला पडला प्रश्न, शमीच्या जागी संघात आला धोकादायक

वनडे मालिकेसाठी भारतीय संघ : रोहित शर्मा (कर्णधार), शिखर धवन, विराट कोहली, रजत पाटीदार, श्रेयस अय्यर, राहुल त्रिपाठी, वॉशिंग्टन सुंदर, अक्षर पटेल, शाहबाज अहमद, केएल राहुल, ऋषभ पंत, इशान किशन, शार्दुल ठाकूर, उमरान मलिक, मोहम्मद सिराज, दीपक चहर, कुलदीप सेन

संघात स्थान, तरीही नेहमी प्लेइंग ११ च्या बाहेरच, रोहित या ३१ वर्षीय खेळाडूला पहिली संधी देणार?

बांगलादेशचा संघ : यासिर अली, नजमुल हुसेन शंटो, शाकीब अल हसन, अफीफ हुसेन, महमदुल्लाह, मेहदी हसन मिराज, लिटन दास, अनामुल हक, मुशफिकुर रहीम, नुरुम हसन, मुस्तफिजुर रहमान, तस्किन अहमद, हसन महमूद, एबादोत हुसेन, नासुम अहमद