IND vs NZ : पदार्पणाची कॅप देताना सुनील गावस्कर श्रेयस अय्यरबद्दल नेमकं काय म्हणाले, पाहा...

IND vs NZ : कानपूर : कसोटी कारकीर्दीची धडाक्यात सुरवात करणाऱ्या काही मोजक्या खेळाडूंच्या यादीत आता श्रेयस अय्यरचा समावेश झाला आहे. कानपूरच्या ग्रीन पार्कमध्ये आपल्या कसोटी कारकिर्दीला सुरुवात करताना त्याने न्यूझीलंडविरुद्धच्या पहिल्या डावात अर्धशतकी खेळी केली. अय्यरने ९४ चेंडूत त्याचे अर्धशतक पूर्ण केले. या खेळीदरम्यान त्याने अनेक शानदार फटके मारले. श्रेयस अय्यरला यावेळी पदार्पणाची कॅप भारताचे माजी महान क्रिकेटपटू सुनील गावस्कर यांच्याहस्ते देण्यात आली. गावस्कर यांनी यावेळी श्रेयसबद्दल आपले मत व्यक्त केले.
सुनील गावस्कर म्हणाले, 'श्रेयस अय्यरची ही खेळी महत्त्वाची आहे कारण या खेळीतून त्याचा संयम दिसून येतो. अय्यरला वेगवान खेळपट्ट्या आवडतात, पण कानपूरमध्ये चेंडू थांबत असतानाही त्याने चांगली खेळी केली.' फिरकीपटूंच्या गोलंदाजीवर पुढे जाऊन फटके मारल्याने क्रिकेट समालोचक आकाश चोप्राने त्याचा आगीशी खेळणारा फलंदाज असा उल्लेख केला आहे.
महत्वपूर्ण अर्धशतकी खेळी
श्रेयस अय्यरने केलेली अर्धशतकी खेळी ही भारतीय संघासाठी खूप महत्त्वाची ठरली आहे. कारण चेतेश्वर पुजारा आणि अजिंक्य रहाणे हे अनुभवी खेळाडू लवकर माघारी परतले. भारताने १४५ धावांत ४ गडी गमावल्यानंतर अय्यर-जडेजा जोडीने पाचव्या विकेटसाठी अर्धशतकी भागीदारी केली. अय्यरला सेट व्हायला थोडा वेळ घेतला, पण जम बसल्यानंतर त्याने जोखीमपूर्ण फटके मारण्यास मागे-पुढे बघितले नाही. टी-२० मध्ये पदार्पण करून बराच काळ झाल्यानंतर आता श्रेयसला कसोटी संघात स्थान मिळाले आणि त्याने या संधीचे सोनं करण्याची संधी सोडली नाही. पहिल्या दिवशी भारताची अवस्था चार बाद १४५ असताना त्याने रविंद्र जडेजा सोबत डाव सावरला आणि पदार्पणाच्या सामन्यात अर्धशतक करण्याचा विक्रम केला.
शुभमन गिलचे अर्धशतक
दरम्यान, सलामीवीर शुभमन गिलनेही चांगली फलंदाजी केली. एक खराब शॉट खेळल्यामुळे तो बाद झाला. जेमिसनने शुभमन गिलचा त्रिफळा उडवला. त्यानंतर जेमिसनने मयंक अग्रवाल, अजिंक्य रहाणे यांनाही तंबूचा रस्ता दाखवला. मयंक अग्रवाल १३ आणि रहाणे ३५ धावा करून बाद झाले. पुजाराही फक्त २६ धावा करू शकला.