'विराट' लक्ष्य! कसोटी क्रमवारीत कोहली अव्वल स्थानी झेप घेणार

नवी दिल्ली: अॅशेस मालिकेतून ऑस्ट्रेलियाचा माजी कर्णधार स्टीव्ह स्मिथ यानं जबरदस्त वापसी केली आणि त्या जोरावर त्यानं आयसीसी कसोटी क्रमवारीत पहिलं स्थानही मिळवलं. स्मिथच्या आधी विराट कोहली सलग १३ महिने क्रमांक एकवर होता. कसोटी क्रमवारीत सध्या विराट ९३६ अंकांसह दुसऱ्या स्थानी आहे. पहिल्या स्थानी असलेल्या स्मिथपेक्षा विराट फक्त एक गुण पिछाडीवर आहे. विराटचं आता अव्वल स्थानी झेप घेण्याचं लक्ष्य असेल. दक्षिण आफ्रिकाविरुद्ध सुरू असलेल्या कसोटी मालिकेत विराट जबरदस्त फार्मात आहे. त्यामुळं तो पुन्हा अव्वल स्थानी झेप घेईल, असा विश्वास चाहत्यांना आहे.

दक्षिण आफ्रिकाविरुद्ध पुण्यात झालेल्या दुसऱ्या कसोटीत विराटनं नाबाद २५४ धावांची तडाखेबंद खेळी केली होती. या खेळीचा विराटला कसोटी क्रमवारीत फायदा झाला. त्यामुळं सहाजिकच पहिल्या आणि दुसऱ्या स्थानातील गुणांचा फरक कमी झाला. आता विराट स्मिथपेक्षा फक्त एका गुणाने पिछाडीवर आहे. रांची येथे होणाऱ्या तिसऱ्या कसोटी सामन्यात चांगली खेळी करून कसोटी क्रमवारीत अव्वल स्थानी झेप घेण्याचा त्याचा मानस आहे. दुसऱ्या कसोटी सामन्यात २५४ धावांची खेळी करून विराटनं कसोटी कारकिर्दीतील सातवं द्विशतक झळकावलं होतं.

मलाही राग येतो, कधी-कधी नाचावेसेही वाटते: धोनी

विराट भारताची शान आहे, गांगुलीने केले कौतुक

विराट वेडा चाहता! अंगावर काढले १६ टॅटू

विराट कोहलीच्या नेतृत्वाखालील भारतीय संघ दक्षिण आफ्रिका संघाला या मालिकेत ३-० अशा फरकानं धूळ चारण्याच्या इराद्यानं रांचीच्या मैदानात उतरणार आहे. तर दुसरीकडे धावांची बरसात करण्याचा विराट कोहलीचा मानस असेल. जागतिक कसोटी क्रमवारीत अव्वल असलेला स्टीव्ह स्मिथ आणि भारतीय संघाचा कर्णधार विराट कोहली हे दोघेही 'रनमशीन' आहेत. त्यामुळं या दोघांमध्ये जागतिक कसोटी क्रमवारील अव्वल स्थान पटकावण्याची स्पर्धा सुरू आहे, असं म्हटलं तर वावगे ठरणार नाही.

ऑस्ट्रेलियाचा संघ २१ नोव्हेंबरपासून पाकिस्तानविरुद्ध कसोटी मालिका खेळणार आहे. ऑस्ट्रेलिया आणि पाकिस्तान यांच्यात दोन सामन्यांची कसोटी मालिका होईल. या मालिकेत दमदार फलंदाजी करून पुन्हा कसोटी क्रमवारीत अव्वल स्थान राखण्याचे त्याचे प्रयत्न असतील.