INDvsENG : नवख्या वेगवान गोलंदाजाचा टीम इंडियामध्ये समावेश, गोलंदाजी होणार आणखी मजबूत

INDvsENG : ओव्हल : चौथ्या कसोटीच्या एक दिवस आधी भारतीय संघानं मोठा बदल केला आहे. वेगवान गोलंदाज प्रसिद्ध कृष्णाला संघात स्थान देण्यात आलं आहे. आतापर्यंत तो राखीव खेळाडू म्हणून संघासोबत होता. त्यामुळे चौथ्या कसोटीत त्याला संधी मिळेल, असे जाहीर करण्यात आलं आहे. तिसऱ्या कसोटीत टीम इंडियाचा डावाने पराभव झाला होता. सध्या ५ सामन्यांची मालिका १-१ ने बरोबरीत आहे. पहिली कसोटी अनिर्णित होती, तर लॉर्ड्सवर खेळलेली दुसरी कसोटी टीम इंडियाने जिंकली होती.

बीसीसीआयचे सचिव जय शाह यांनी जारी केलेल्या प्रसिद्धीपत्रकात प्रसिद्ध कृष्णाचा संघात समावेश करण्याबाबत माहिती देण्यात आली आहे. इतर खेळाडू पूर्वीप्रमाणेच संघात आहेत. आता राखीव खेळाडू म्हणून फक्त अर्जन नागवासवाला आहे. दुसरीकडे मयांक अग्रवाल, उमेश यादव, अक्षर पटेल, हनुमा विहारी, आर. अश्विन, रिद्धिमान साहा, अभिमन्यू ईश्वरन, पृथ्वी शॉ आणि सूर्यकुमार यादव यांनाही आतापर्यंत खेळण्याची संधी मिळालेली नाही.

फक्त ९ प्रथम श्रेणी सामन्यांचा अनुभव
२५ वर्षीय वेगवान गोलंदाज प्रसिद्ध कृष्णाला फक्त ९ प्रथम श्रेणी सामने खेळण्याचा अनुभव आहे. त्याने ९ सामन्यांमध्ये ३४ विकेट्स घेतल्या आहेत. तो गेल्या वर्षी मार्चमध्ये शेवटचा प्रथम श्रेणी सामना खेळला. तो टीम इंडियासाठी वनडेमध्ये उतरला आहे. त्याने ३ एकदिवसीय सामन्यांमध्ये ६ विकेट्स घेतल्या. याशिवाय त्याने ५१ लिस्ट ए मॅचमध्ये ८७ विकेट्स घेतल्या आहेत. त्याच्या एकूण टी-२० कारकिर्दीबद्दल बोलायचं झालं, तर त्याने ४७ सामन्यात ४१ विकेट्स घेतल्या आहेत.

ईश्वरनला संधीही मिळाली नाही
यापूर्वी अभिमन्यू ईश्वरनला राखीव खेळाडूनंतर संघात स्थान मिळाले होते, पण त्याला मालिकेत संधी मिळाली नाही. सलामीवीर म्हणून के.एल. राहुलने चमकदार कामगिरी केली आहे. इंग्लंडविरुद्धच्या मालिकेत टीम इंडियासाठी शतक झळकावणारा तो एकमेव फलंदाज आहे.