Video : विश्वविजयानंतर कीर्ती आझाद यांच्या मिस्ट्री बॉलचे गूढ अजूनही कायम; पाहा भन्नाट व्हिडीओ...

मुंबई : ही गोष्ट आहे १९८३ च्या विश्वचषकाच्या उपांत्य फेरीची. या सामन्यात भारत आणि इंग्लंड आमनेसामने होते. २२ जून १९८३ रोजी मँचेस्टरमध्ये झालेल्या या सामन्यात कीर्ती आझाद यांनी टाकलेल्या एका मिस्ट्री बॉलवर इयान बोथम क्लीन बोल्ड झाले होते. त्यानंतर मैदानावरच कर्णधार कपिल देव यांनी कीर्ती आझाद यांना विचारले की, चेंडू एकतर खाली राहू शकतो किंवा टर्न होऊ शकतो, पण दोन्ही कसे काय झाले?

३८ वर्षांनंतरही याचे गूढ कायम आहे. हा प्रसंग कीर्ती आझाद यांनी '८३' चित्रपटाशी संबंधित एका कार्यक्रमात शेअर केला आहे. ज्याचा व्हिडिओ कपिल देव ऑन-स्क्रीनची भूमिका साकारत असलेल्या रणवीर सिंगने आपल्या इन्स्टाग्राम पेजवरून शेअर केला आहे.

रणवीर सिंहने या व्हिडिओच्या कॅप्शनमध्ये लिहिले की, '३८ वर्षांनंतरही हे गूढ उकललेले नाही'. या व्हिडिओमध्ये रणवीर सिंह इव्हेंट होस्टची भूमिका निभावत असून त्याच्यासोबत स्टेजवर यशपाल शर्मा, कपिल देवही दिसत आहेत.

कीर्ती आझाद यांनी सांगितला किस्सा
या घटनेची संपूर्ण कहाणी सांगताना कीर्ती आझाद म्हणाले, 'मी आणि जिमी (मोहिंदर अमरनाथ) गोलंदाजी करत होतो. आम्ही १२ षटकात ५४ धावा देत ४ बळीही घेतले. त्यात मला इयान बोथमची विकेट मिळाली. चेंडू खूप खाली राहिला होता आणि एक टर्नही झाला होता. बोथमची विकेट पडल्यानंतर मैदानात अनेक प्रेक्षक धावत आले आणि माझ्या खिशात ५०-५० पौंडाच्या नोटा टाकल्या, त्या नोटा अजून माझ्याकडे आहेत. कपिलने मला विचारले की, हे कसे झाले? खरे सांगू, आजही माझ्याकडे उत्तर नाही.'

१९८३ मध्ये भारतीय संघाने कपिल देव यांच्या नेतृत्वाखाली इतिहास रचला आणि पहिल्यांदाच विश्वविजेते होण्याचा मान मिळवला. भारताच्या या ऐतिहासिक विजयावरील ८३ हा चित्रपट लवकरच म्हणजे २४ डिसेंबर रोजी प्रदर्शित होत आहे. या चित्रपटात वेगवेगळ्या कलाकारांनी वेगवेगळ्या भूमिका साकारल्या आहेत.

या चित्रपटात रणवीर सिंह व्यतिरिक्त त्याची खऱ्या आयुष्यातील पत्नी दीपिका पदुकोण कपिल देव यांच्या पत्नी रोमी भाटियाची भूमिका साकारत आहे. याशिवाय हार्डी संधू, पंकज त्रिपाठी यांच्यासह अनेक स्टार्स वेगवेगळ्या खेळाडूंच्या भूमिकेत दिसणार आहेत.