बुमराला झालेलं स्ट्रेस फ्रॅक्चर म्हणजे काय आणि त्यावर शस्त्रक्रीया का केली जाणार नाही, जाणून घ्या...

मुंबई : जसप्रीत बुमराच्या पाठीमध्ये स्ट्रेस फ्रॅक्चर झालं आणि त्याला विश्वचषकात खेळता येऊ शकत नाही, असे म्हटले जात आहे. पण बुमराला झालेले स्ट्रेस फ्रॅक्चर म्हणजे का, हे फॅक्चर नेमकं कसं होतं आणि बुमराच्या या दुखापतीवर शस्त्रक्रीया का केली जाणार नाही, ही सर्व माहिती आता समोर आली आहे.

बुमाराला नेमकी कधी झाली दुखापत...
भारतीय संघ ऑस्ट्रेलियानंतर दक्षिण आफ्रिकेशी दोन हात करण्यासाठी सज्ज झाला होता. पहिल्या ट्वेन्टी-२० सामन्यासाठी भारतीय संघ सराव करण्यात मग्न होता. त्यावेळी बुमराही नेट्समध्ये सराव करत होता. हा सराव करत असताना बुमराला दुखापत झाली. त्यानंतर बुमरा पहिल्या ट्वेन्टी-२० सामन्यात खेळणार नसल्याचे समोर आले. त्यामुळे बुमराच्या जागी दीपक चहरला संधी देण्यात आली. पण गुरुवारी बुमरा विश्वचषक खेळणार नसल्याचे आता समोर आले आहे.

स्ट्रेस फॅक्चर म्हणजे नेमकं असतं तरी काय...
बुमराच्या पाठीमागे स्ट्रेस फॅक्चर झालं आहे. जेव्हा तुम्ही शरीराच्या एका भागावर जास्त ताण देता तेव्हा तुमच्या स्नायू किंवा हाडांना दुखापत होऊ शकते. त्यावेळी स्नायू किंवा हाडांना छोटं फ्रॅक्चर होऊ शकतं. त्यामुळे यासाठी शरीराच्या एकाच भागावर जास्त ताण पडू नये, याची काळजी घ्यायची असते.

बुमराच्या स्ट्रेस फॅक्चरवर शस्त्रक्रीया का करण्यात येणार नाही...जर एखादं फ्रॅक्चर झालं की लगेच शस्त्रक्रीया केली जाते, असे आपण ऐकून आहोत. पण बुमराच्या फॅक्चरवर यावेळी शस्त्रक्रीया करण्यात येणार नाही, असे सांगण्यात आले आहे. बुमराच्या फ्रॅक्चरवर शस्त्रक्रीया करून त्याला विश्वचषकासाठी संघात दाखल करा, अशी इच्छा भारताच्या चाहत्यांची असेल. पण तसे करता येणार नाही. कारण जेव्हा स्ट्रेस फॅक्चर होते, तेव्हा शक्यतो शस्त्रक्रीया टाळली जाते. कारण त्यावेळी फिजिओथेरीपीवर जास्त भर दिला जातो. कारण स्ट्रेस फॅक्चर हे फिजिओथेरेपीने बरे होऊ शकते. त्यामुळे शस्त्रक्रीया करू नये, असा सल्ला काही वेळा दिला जातो. त्यामुळे यावेळी बुमराच्या या स्ट्रेस फॅक्चरवर शस्त्रक्रीया न करता त्याला अन्य मार्गाने फिट करण्याचा निर्णय बीसीसीआयने घेतला असल्याचे पाहायला मिळत आहे.