धोनीच्या निवृत्तीच्या अफवेनंतर साक्षीने डिलीट केलं 'ते' ट्विट

भारताचा माजी कर्णधार महेंद्रसिंग धोनीच्या निवृत्तीची बातमी आज वाऱ्यासारखी पसरली होती. धोनी आता निवृत्ती घेत आहे, असे सोशल मीडियावर व्हायरल झाले होते. पण ही अफवा असल्याचे त्यानंतर पुढे आले. पण या सर्व गोष्टींना एक वेगळेच वळण मिळाले जेव्हा धोनीची पत्नी साक्षीने एक ट्विट डिलीट केले. त्यामुळे धोनीच्या निवृत्तीची बातमी खरी आहे का, असे चाहत्यांना वाटायला लागलेले आहे.

गेल्या वर्षी झालेल्या विश्वचषकात धोनी खेळला होता. त्यानंतर जवळपास एक वर्षे धोनी भारताकडून खेळलेला नाही. धोनी ऑस्ट्रेलियामध्ये होणाऱ्या ट्वेन्टी-२० विश्वचषकात भारताकडून खेळेल, असे सर्वांना वाटत होते. पण आता ट्वेन्टी-२० विश्वचषक रद्द होण्याच्या मार्गावर आहे. त्यामुळे धोनी आता भारतीय संघात दिसणार की नाही, हा संभ्रम चाहत्यांच्या मनात आहे. विश्वचषक झाला नाही तर धोनी भारताकडून खेळणार नाही, असे काही जणांना वाटले आणि सोशल मीडियावर धोनीच्या निवृत्तीच्या बातमीचे पेव फुटले.

धोनीच्या निवृत्तीची बातमी पसरत असताना साक्षीने एक ट्विट केले होते. या ट्विटमध्ये साक्षीने धोनीच्या निवृत्तीची चर्चा करणाऱ्यांना चांगलेच फटकारले होते. धोनीची निवृत्ती ही एक अफवा आहे. लॉकडाऊनच्या काळात लोकांची मानसीत स्थिती बिघडलेली आहे, असे साक्षीने आपल्या ट्विटमध्ये म्हटले होते. पण साक्षीने काही वेळानंतर हे ट्विट डिलीट करून टाकले. त्यामुळे धोनीच्या निवृत्तीची बातमी खरी आहे, असे आता लोकांना वाटत आहे.


३८ वर्षीय भारताच्या या माजी कर्णधाराच्या निवृत्तीची चर्चा सोशल मीडियावर होण्याची ही पहिली वेळ नाही. पण मोठ्या कालावधीपासून भारतीय संघातून न खेळलेल्या धोनीला आयपीएलमधून टीम इंडियात परत यायचे होते. पण करोना व्हायरसमुळे आयपीएल अनिश्चित काळासाठी स्थगित करण्यात आली. त्यामुळे धोनीचे करियर संपले अशी चर्चा सुरू झाली होती.


धोनीने भारताकडून ९० कसोटी, ३५० वनडे आणि ९८ टी-२० सामने खेळले आहे. त्याने कसोटीत ४ हजार ८७६, वनडेत १० हजार ७७३ आणि टी-२०त १ हजार ६१७ धावा केल्या आहेत. कर्णधार म्हणून धोनीने २०० सामन्यात संघाचे नेतृत्व केले. यातील ११० सामन्यात विजय आणि ७४ मध्ये पराभव झाला. धोनी भारताकडून सर्वाधिक सामन्यात कर्णधार म्हणून जबाबदारी पार पाडणारा खेळाडू आहे.