Video : वानखेडे स्टेडियममध्ये पुन्हा घुमला 'सचिन-सचिन..'चा नारा, कारण ऐकाल तर तुम्हीही हैराण व्हाल...

मुंबई : क्रिकेटचा देव समजल्या जाणार्‍या सचिन तेंडुलकरला निवृत्त होऊन कित्येक वर्ष उलटली आहेत, पण तो आजही चाहत्यांच्या हृदयावर राज्य करतो. भारत आणि न्यूझीलंड यांच्यात सुरू असलेल्या मुंबई कसोटीच्या तिसऱ्या दिवशी रविवारी (५ डिसेंबर) याचे ताजे उदाहरण पाहायला मिळाले. टीम इंडियाचा युवा खेळाडू शुभमन गिल आणि कर्णधार विराट कोहली मैदानात असताना ही घटना घडली.

खरे तर भारतीय संघाच्या दुसऱ्या डावातील ३७व्या षटकातील पहिल्या चेंडूवर गिलने जोरदार फटका मारला. सीमारेषेच्या दिशेने चाललेला चेंडू अडविण्यासाठी न्यूझीलंडच्या खेळाडूने कसोशीने प्रयत्न केले, पण तोपर्यंत चौकार गेला होता. त्यानंतर काही क्षणातच स्टेडियममध्ये उपस्थित असलेले प्रेक्षक 'सचिन...सचिन...' अशा घोषणा देताना दिसले. मास्टर ब्लास्टर सचिन तेंडुलकरने २०१३ मध्ये वानखेडे मैदानावरच वेस्ट इंडिजविरुद्ध शेवटची कसोटी खेळली होती.

दरम्यान, रविवारी उपाहारापर्यंत भारताने दुसऱ्या डावात २ बाद १४२ धावा केल्या होत्या, पण त्यानंतर डाव ढासळला. गिल (४७) आणि कोहलीचा (३६) अडथळा रचिन रविंद्रने दूर केला. अक्षर पटेल वगळता श्रेयस अय्यर, वृद्धिमान साहा, जयंत यादव यांना मोठी खेळी करता आली नाही. पटेलने २६ चेंडूत ३ चौकार आणि ४ षटकार लगावत नाबाद ४१ धावा केल्या. ७ बाद २७६ धावांवर भारताने आपला डाव घोषित केला. यासह भारताकडे ५३९ धावांची आघाडी होती. विजयासाठी भारताने न्यूझीलंडपुढे ५४० धावांचा डोंगर उभा केला आहे.

दरम्यान, न्यूझीलंडकडून एजाज पटेलने मयांक अग्रवाल, चेतेश्वर पुजारा, श्रेयस अय्यर आणि जयंत यादव यांची विकेट घेत एका सामन्यात १४ बळींची नोंद केली आहे. एजाजने पहिल्या डावात ११९ धावांत भारतीय संघातील सर्व १० गडी बाद केले होते.