आली रे... मुंबई इंडियन्सचा संघ WPL च्या अंतिम फेरीत दाखल, युपीच्या संघाला चारली धुळ

नवी मुंबई : मुंबई इंडियन्सच्या संघाने आजच्या महत्वाच्या सामन्यात युपी वॉरियर्सला धुळ चारली आणि दिमाखात अंतिम फेरीत स्थान पटकावले आहे. नॅट स्विहरच्या वादळी फलंदाजीच्या जोरावर मुंबई इंडियन्सने १८२ धावा फटकावल्या होत्या. त्यानंतर मुंबई इंडियन्सच्या इसी वाँगने हॅट्रीक घेतली आणि संघाच्या विजयात मोलाचा वाटा उचलला. या स्पर्धेतील ही पहिली हॅट्रीक ठरली आहे. धडाकेबाज फलंदाजी आणि भेदक गोलंदाजीच्या जोरावर मुंबईने युपीच्या संघाला ७२ धावांनी पराभूत केले आणि त्यांनी अंतिम फेरीत प्रवेश केला आहे. अंतिम फेरीत मुंबईला आता दिल्ली कॅपिटल्सशी सामना करावा लागणार आहे.

मुंबईचा संघ प्रथम फलंदाजीसाठी उतरला आणि त्यांना चांगली सुरुवात मिळाली. मुंबईच्या यास्तिका भाटीयाने यावेळी संघाला आक्रमक सुरुवात करून दिली. यास्तिकाने यावेळी १८ चेंडूंत चार चौकारांच्या जोरावर २१ धावा केल्या. पण यास्तिका बाद झाली आणि त्यानंतर मैदानात नॅट सिव्हर-ब्रंटचे वादळ घोघांवले. ब्रंटने यावेळी युपीच्या गोलंदाजीचा चांगलाच समाचार घेतला. कारण ब्रंट खेळायला आली आणि त्यानंतर मुंबईची धावगती ही चांगलीच वाढली. ब्रंटच्या फलंदाजीपुढे यावेळी युपीच्या गोलंदाजांना नतमस्तक व्हावे लागले. कारण ब्रंटने यावेळी चौफेर फटकेबाजी केली आणि मुंबईला मोठ्या धावसंख्येचे स्वप्न दाखवले आणि ते सत्यातही उतरवले. कारण ब्रंटने यावेळी ३८ चेंडूंत ९ चौकार आणि दोन षटकांच्या जोरावर नाबाद ७२ धावांची वादळी खेळी साकारली. ब्रंटच्या या फलंदाजीच्या जोारावर मुंबईच्या संघाला २० षटकांत ४ बाद १८२ अशी मोठा धावसंख्या उभारता आली.

युपीचा संघ मुंबईच्या धावांचा पाठलाग करायला उतरला खरा, पण त्यांना सुरुवातीपासून चांगली लय सापडली नाही. ठराविक फरकाने त्यांनी आपले विकेट्स गमावले आणि त्यामुळे त्यांची अवस्था चांगली नव्हती. त्यामध्येच वाँगने हॅट्रीक साजरी केली आणि त्यांचे पुरते कंबरडे मोडले. या हॅट्रीकनंतर तर युपी हा सामना जिंकणार नाही हे जवळपास स्पष्ट झाले आणि त्यामुळेच मुंबई आता अंतिम फेरीत पोहोचणार हे त्यावेळीच समजले होते.

मुंबई इंडियन्यने या स्पर्धेत चांगली कामगिरी केली आहे. त्यामुळेच त्यांना अंतिम फेरीत पोहोचता आले आहे. आता मुंबईने जर एक सामना जिंकला तर त्यांना जेतेपद आपल्या नावावर करता येणार आहे.