गर्वहरण... पहिल्या T 20 सामन्यात न्यूझीलंडपुढे भारताचे लोटांगण, सुंदरचे अर्धशतक ठरले निष्फळ

रांची : आमच्या मातीत आम्हीच राजे... असा गर्व भारताच्या संघाला होता. पण गर्वाचे घर खाली असल्याचे पहिल्याच T 20 सामन्यात पाहायला मिळाले. भारताच्या संघावर पहिल्याच सामन्यातत न्यूझीलंडपुढे लोटांगण घालण्याची वेळ आली. भारताच्या फलंदजांनी यावेळी निराशा केली आणि त्यामुळे भारताला न्यूझीलंडच्या या दौऱ्यातील पहिला पराभव पत्करावा लागला. वॉशिंग्टन सुंदरने यावेळी अर्धशतक झळकावले खरे, पण तोपर्यंत हा सामना भारताच्या हातून निसटलेला होता. भारताला या सामन्यात २१ धावांनी पराभव पत्करावा लागला.

न्यूझीलंडच्या आव्हानाचा पाठलाग करण्यासाठी भारताचा संघ उतरला खरा, पण भारताला दुसऱ्या षटकात पहिला धक्का बसला. इशान किशनने एक चौकार लगावला खरा, पण त्यानंतर त्याला एकही धाव करता आली नाही आणि तो चार धावांवर बाद झाला. त्यानंतर तिसऱ्याच षटकात भारताला दुसरा धक्का बसला. इशान बाद झाल्यावर राहुल त्रिपाठी हा फलंदाजीसाठी आला होता. राहुल यावेळी सहा चेंडू खेळला खरा, पण त्याला भोपळाही फोडता आला नाही. जेकब टफीने त्याला शून्यावर बाद केले. भारताची २ बाद ११ अशी अवस्था झाली होती. त्यानंतर चौथ्या षटकात भारताला अजून एक धक्का बसला. न्यूझीलंडचा कर्णधार मिचेल सँटनरने यावेळी भारताचा सलामीवीर शुभमन गिलला बाद केले आणि भारताला तिसरा धक्का दिला. गिलला यावेळी ७ धावांवर समाधान मानावे लागले.

भारताची चौथ्या षटकात ३ बाद १५ अशी दयनीय अवस्था झाली होती. त्यानंतर हार्दिक आणि सूर्या हे खेळपट्टीवर होते. कर्णधार आणि उपकर्णधार आता भारताला विजय मिळवून देणार का, याकडे सर्वांचे लक्ष होते. सूर्या हा धडाकेबाज फलंदाजी करत धावांची लूट करत होता. सूर्या ४७ धावांवर होता, त्यामुळे तो आता अर्धशतक झळकावेल असे वाटत होते. पण त्यावेळी एक मोठा फटका मारण्याच्या नादात सूर्या बाद झाला आणि भारताला सर्वात मोठा धक्का बसला. सूर्याने ३४ चेंडूंत सहा चौकार आणि दोन षटकारांच्या जोरावर ४७ धावा केल्या. सूर्या बाद झाल्यावर पाचव्याच चेंडूवर हार्दिक पंड्याही बाद झाला आणि भारताला एकामागून एक दुसरा धक्का बसला. पंड्याला यावेळी २१ धावा करता आल्या. त्यानंतर वॉशिंग्टन सुंदर आणि दीपक हुडा यांच्यावर भारताचे भवितव्य होते. यावेळी सुंदरला १० धावांवर आणि हुडाला २ धावांवर असताना जीवदान मिळाले. त्यामुळे ही जोडी काय कमाल करते, याकडे सर्वांचे लक्ष लागलेले होते. या जीवदानाचा फायदा हुडाला उचलता आला नाही आणि तो १० धावांवर बाद झाला.