'आमच्याकडं स्टेडियमच नाही पण...'; टी-20 वर्ल्डकप आयोजन करणाऱ्या देशाचं मोठं वक्तव्य

मस्कत : कोरोना व्हायरसच्या दुसऱ्या लाटेने भारतात थैमान घातल्यामुळे पूर्वनियोजित टी-20 विश्वचषक स्पर्धा रद्द करण्यात आली. आता ही स्पर्धा यूएई आणि ओमानमध्ये आयोजित करण्याचा निर्णय आयसीसीने घेतला आहे. या पार्श्वभूमीवर ओमानचे क्रिकेट सचिव यांनी दिलेल्या प्रतिक्रियेमुळे अनेकांच्या भुवया उंचावल्या गेल्या आहेत. आमच्याकडे स्टेडियम नाहीत, दोन मैदाने आहेत, त्यावर सर्व प्रकारच्या सुविधा नाहीत, असे ओमानचे क्रिकेट सचिव मधु जेसरानी यांनी म्हटले आहे.

वाचा- ऑलिम्पिक सुरू होण्याआधी करोनाचा शिरकाव; जपानमध्ये पोहोचलेल्या झाली लागण

जेसरानी पुढे म्हणाले, येथील खेळपट्ट्या भारतीय उपखंडातील खेळपट्ट्यांसारख्या असतील. फिरकी गोलंदाजांना या मैदानांवर मदत मिळेल. सध्या तेथील पायाभूत सुविधांचे काम सुरू असल्याची माहितीही जेसरानी यांनी दिली.

खूप कामे करावी लागणार

मधु जेसरानी यांनी इंडिया टुडेशी बोलताना म्हटले की, ओमानकडे इतर देशांसारखी सर्व सुविधांनी सुसज्ज अशी स्टेडियम नसून फक्त मैदाने आहेत. एका मैदानावर दोन ड्रेसिंग रुम आहेत. दुसऱ्या मैदानावरील काम सुरू आहे. तसेच प्रकाशयोजनेचे कामही करण्यात येत आहे. तसेच स्कोअरबोर्ड आणि डिजिटल स्कीनही उभारण्यात येत आहे. येथील तयारीची पाहणी करण्यासाठी बीसीसीआय आणि आयसीसीचे एक पथक लवकरच ओमानला भेट देणार असल्याची माहिती त्यांनी दिली.

वाचा- कर्णधार मिताली राजने केला वर्ल्ड रेकॉर्ड; भारताचा इंग्लंडवर शानदार विजय

ओमानमध्ये क्रिकेट खेळाची लोकप्रियता वाढू लागली आहे. शाळा-महाविद्यालयात फुटबॉलनंतर आता क्रिकेट मोठ्या प्रमाणावर खेळले जात आहे. ओमानमध्ये आतापर्यंत कोणतीच आंतरराष्ट्रीय क्रिकेट स्पर्धा भरविण्यात आली नव्हती. पण आता आयसीसीची मोठी स्पर्धा ओमानमध्ये आयोजित करण्यात येत असून आम्ही सर्व उत्सुक आहोत.

वाचा- विराटपाठोपाठ अनुष्काही होणार क्रिकेटपटू; वाचा सविस्तर

17 ऑक्टोबर ते 14 नोव्हेंबर दरम्यान दुबई इंटरनॅशनल स्टेडियम, शेख झायद स्टेडियम, शारजाह स्टेडियम आणि ओमान क्रिकेट अॅकॅडमीच्या मैदानावर टी-20 विश्वचषक स्पर्धेचे आयोजन करण्यात येणार आहे.