लग्नाच्या वाढदिवशीच क्रिकेटपटूची पत्नी मैदानात ढसाढसा रडली

नवी दिल्ली: क्रिकेटच्या मैदानात नेहमी विक्रम होतात असे नाही. अनेकदा एखाद्या खेळाडूच्या ऐतिहासिक कामगिरी करत आणि त्या सामन्याची नोंद इतिहासात होते. दोन वर्षांपूर्वी केवळ भारतीय क्रिकेट नव्हे तर जागतिक क्रिकेटमधील एका ऐतिहासिक विक्रमाची नोंद झाली होती. हा विक्रम अन्य कोणी नव्हे तर भारताचा 'हिटमॅन' रोहित शर्मा (Rohit Sharma)याने केली होती.

रोहितच्या करिअरमध्ये १३ डिसेंबर या तारखेला खास असे महत्त्व आहे. आजच्या दिवशी दोन वर्षांपूर्वी (१३ डिसेंबर २०१७) रोहित शर्माने वनडे क्रिकेटमधील तिसरे द्विशतक झळकावले होते आणि अशी कामगिरी करणारा तो जगातील पहिलाच फलंदाज ठरला होता. १३ डिसेंबर या तारखेचे रोहितच्या आयुष्यातील आणखी एक महत्त्व म्हणजे त्याच्या लग्नाचा वाढदिवस होय.

दोन वर्षांपूर्वी (२०१७) रोजी श्रीलंकेचा संघ भारत दौऱ्यावर आला होता. १३ डिसेंबर रोजी मोहाली क्रिकेट मैदानावर रोहितने वनडे क्रिकेटमधील आणखी एक शानदार खेळी केली. श्रीलंकेविरुद्ध रोहितने १५८ चेंडूत नाबाद २०८ धावा केल्या होत्या. या तुफानी खेळीत त्याने १३ चौकार आणि १२ षटकार मारले. रोहितचे हे वनडे क्रिकेटमधील तिसरे द्विशतक होते आणि अशी कामगिरी करणारा तो पहिलाच क्रिकेटपटू ठरला होता.


रोहितची ही खेळी पाहण्यासाठी पत्नी रितिका स्टेडियममध्ये होती. रोहित जस जसा द्विशतकाच्या जवळ पोहोचू लागला. सर्व भारतीय चाहते आणि रोहितची पत्नी रितिका यांनी द्विशतकासाठी हात जोडले. रितिकाने तर द्विशतकाच्या आधी फिंगर क्रॉस केले. अखेर जेव्हा रोहितने द्विशतकी धाव घेतली त्या क्षणी रितिका भावूक झाली आणि आनंदात तिच्या डोळ्यातून पाणी आले. रोहितने देखील मैदानातून रिंग फिंगर किस करत ही द्विशतकी खेळी पत्नीला भेट म्हणून दिली. त्याआधी रोहित शर्माने श्रीलंकेविरुद्धच २०१४मध्ये १७३ चेंडूत २६४ धावांची वादळी खेळी केली होती. वनडे क्रिकेटच्या इतिहासातील ही सर्वाच्च खेळी आहे.