Lowest Score In Test: क्रिकेटमधील या विक्रमामध्ये असे आहे तरी काय जो कोणालाच मोडायचा नाही, जाणून घ्या...

नवी दिल्ली: २८ मार्च १९५५ न्यूझीलंडच्या ऑकलंड येथे कसोटी क्रिकेटच्या इतिहासात असा एक विक्रम नोंदवला गेला जो आजवर कोणी मोडला नाही आणि मोडण्याची कोणाची इच्छा देखील असणार नाही. इंग्लंड आणि न्यूझीलंड यांच्यात झालेल्या या सामन्यात कसोटी क्रिकेटच्या इतिहासातील सर्वात कमी धावसंख्येचे नोंद झाली. इंग्लंडविरुद्ध न्यूझीलंड फक्त २६ धावांवर बाद झाले.

वाचा- कोण आहे आयुष बदोनी? राहुल द्रविडने सांगितले होते की...

१९५५ साली दोन्ही संघात दोन सामन्यांची कसोटी मालिका झाली होती. या दोन्ही लढती इंग्लंडने जिंकल्या. दुसऱ्या कसोटीत न्यूझीलंडचा डाव फक्त २६ धावांवर गुंडाळला गेला. त्याआधी पहिल्या डावात न्यूझीलंडचा २०० धावात ऑलाआउट केला होता. इंग्लंडने पहिल्या डावात ४६ धावांची आघाडी घेतली होती. सामन्याच्या तिसऱ्या दिवशी इंग्लंडकडे ४६ धावांची आघाडी असताना त्यांनी सामना एक डाव आणि २० धावांनी जिंकला. न्यूझीलंडचा एकही फलंदाज इंग्लंडच्या गोलंदाजीपुढे टीकला नाही. सर्वात मोठी भागिदारी सहाव्या विकेटसाठी ८ धावांची झाली जी कर्णधार ज्योफ रॅबोन आणि हॅरी केव्ह यांनी मिळून केली.

न्यूझीलंडकडून बर्ट सटक्लिफ (११) वगळता एकाही फलंदाजाला दुहेरी धावसंख्या करता आली नाही. आठ फलंदाज १ आणि शून्य धावांवर बाद झाले तर बॉब एपलयार्ड ४ आणि ब्रायन स्टॅथम यांनी ३ धावा केल्या. याआधी कसोटीत कमी धावांचा विक्रम द.आफ्रिकेच्या नावावर होता, त्यांचा दोन वेळा ३० धावांवर ऑलआउट झाला होता. इंग्लंडने १९२४ आणि १८९६ मध्ये द.आफ्रिकेचा ३० धावांवर ऑलआउट केला.

वाचा- सामन्यापेक्षा क्रिकेटपटूच्या पत्नीची चर्चा अधिक; खेळाडू बाद झाल्यावर पाहा काय केले

भारतीय संघाबाबत बोलायचे झाले तर कसोटीत सर्वात कमी धावसंख्या ३६ इतकी आहे. २०२० मध्ये ऑस्ट्रेलियाविरुद्ध एडिलेड कसोटीत दुसऱ्या डावात भारताचा डाव ३६ वर ऑलआउट झाला होता. पण त्यानंतर टीम इंडियाने मालिकेत जोरदार कमबॅक करून विजय मिळवला होता.

कसोटीतील सर्वात कमी धावसंख्या

-न्यूझीलंड २६ धावा, विरुद्ध इंग्लंड (१९५५)
-द.आफ्रिका ३० धावा, विरुद्ध इंग्लंड(१८९६)
-द.आफ्रिका ३० धावा, विरुद्ध इंग्लंड(१९२४)
-द.आफ्रिका ३५ धावा, विरुद्ध इंग्लंड(१८९९)