पाकिस्तानच्या क्रिकेटपटूने दिलं बुमराला नवं चॅलेंज

पाकिस्तानच्या एका किकेटपटूने भारताचा वेगवान गोलंदाज जसप्रीत बुमराला एक चॅलेंज दिलं आहे. आता हे चॅलेंज आहे तरी काय, याची उत्सुकता चाहत्यांना आहे.

बुमराने २०१३ साली आयपीएलमध्ये मुंबई इंडियन्सकडून पदार्पण केले. बुमराचा मारा अचूक आणि भेदक असल्यामुळे तो काही सामन्यांमध्येच प्रकाशझोतात आला. त्याचबरोबर त्याची गोलंदाजीची शैलीदेखील सर्वांपेक्षा वेगळी आहे. या शैलीमुळे बुमरा नेमका कोणता चेंडू टाकणार, हे समजणे कठीण होते. त्यामुळेच क्रिकेटच्या तिन्ही प्रकारांमध्ये बुमराने आपली चमक दाखवलेली आहे.

सध्याच्या घडीला बुमरा हा जगातील अव्वल गोलंदाजांपैकी एक आहे. आतापर्यंत फक्त १४ कसोटी सामन्यांमध्ये त्याने ६८ बळी मिळवले आहेत. त्याचबरोबर ६४ एकदिवसीय सामन्यांमध्ये त्याच्या नावावर १०४ बळी आहेत. ट्वेन्टी-२० क्रिकेटमध्ये सर्वात जलद पन्नास बळी मिळवणारा वेगवान गोलंदाज बुमरा ठरला आहे. त्यामुळे क्रिकेटच्या तिन्ही प्रकारांमध्ये आतापर्यंत त्याने दमदार कामगिरी केली आहे. कसोटी आणि एकदिवसीय क्रिकेटच्या क्रमवारीत बुमरा हा टॉप टेनमध्ये आहे.

पाकिस्तानचा फलंदाज शान मसूदने बुमराला एक चॅलेंज दिलं आहे. बुमराने आपल्याला गोलंदाजी करावी, असे चॅलेंज शानने जसप्रीतला दिले आहे. याबाबत तो म्हणाला की, " जगभरातील अव्वल गोलंदाजांने नाव घेतले तर त्यामध्ये बुमराचे नाव येते. आतापर्यंत बुमराने भेदक मारा केलेला आहे. त्यामुळे मला विचाराल की, तुला कोणत्या गोलंदाजासमोर खेळायला आवडेल, तर माझे उत्तर बुमरा असेल. आतापर्यंत मी त्याच्या गोलंदाजीसमोर खेळलेलो नाही. त्यामुळे त्याने मला गोलंदाज करावी, असं चॅलेंज मी बुमराला देत आहे."