ऑस्ट्रेलियाच्या मॅचविनर खेळाडूची निवृत्ती, भारताच्या कसोटी मालिकेदरम्यान मोठा निर्णय

नवी दिल्ली : भारत आणि ऑस्ट्रेलिया यांच्यातील चौथा सामना आता रंगतदार अवस्थेत आहे. पण हा चौथा सामना सुरु असतानाच ऑस्ट्रेलियाच्या मॅचविनर खेळाडूने निवृत्ती जाहीर केली असून त्यामुळे आता सर्वांनाच धक्का बसला आहे.

या मालिकेत पहिल्यांदाच ऑस्ट्रेलियाचा संघ एवढी मोठी धावसंख्या उभारून आघाडीवर आहे. कारण या मालिकेत आतापर्यंत ऑस्ट्रेलियाला एवढी मोठी धावसंख्या उभारता आली नव्हती. पहिल्यांदाच त्यांनी ४०० धावांचा टप्पा गाठला आणि सामन्यावरील पकड मजबूत केली आहे. ऑस्ट्रेलियाने हा सामान जिंकण्याच्या दिशेने आता हे एक मोठे पाऊल टाकले आहे. त्यामुळे ऑस्ट्रेलियाचा संघ सामन्यात फ्रंटफूटवर असला तरी त्यांच्या मॅचविनर खेळाडूने आता निवृत्ती जाहीर केली आहे.

ऑस्ट्रेलियाचा धडाकेबाज फलंदाज शॉन मार्शने आता क्रिकेटमधून निवृत्तीची घोषणा केली आहे. मार्शने वनडे आणि प्रथम श्रेणी क्रिकेट यापुढे खेळणार नसल्याचे जाहीर केले आहे. मार्श हा ऑस्ट्रेलियाचा एक धडाकेबाज फलंदाज होता. आयपीएलच्या पहिल्याच मोसमात धमाकेदार कामगिरी करणारा ऑस्ट्रेलियन डॅशिंग खेळाडू, अशी मार्शची ओळख निर्माण झाली होती. २००८ साली जेव्हा आयपीएल सुरू झाली तेव्हा शॉन मार्शने त्या पहिल्या सत्रात ११ सामने खेळताना ६८.४४ च्या सरासरीने ६१६ धावा केल्या होत्या. मार्शने आतापर्यंत आयपीएलमध्ये एकूण ७१ सामने खेळले आहेत, ज्यामध्ये त्याने ३९.९५ च्या सरासरीने २४७७ धावा केल्या आहेत, यामध्ये एक शतक आणि २९ अर्धशतकांचा समावेश आहे. २०१७ मध्ये तो शेवटचा आयपीएल सामना खेळला होता.

मार्शने वयाच्या १७ व्या वर्षी प्रथम श्रेणी क्रिकेटमध्ये पदार्पण केले आणि २२ वर्षांनी आज १० मार्चला त्याने निवृत्तीची घोषणा केली. त्याची देशांतर्गत क्रिकेट कारकीर्द नेत्रदीपक राहिली आहे. त्याने प्रथम श्रेणीमध्ये ४१.२० च्या सरासरीने १२ हजारांहून अधिक धावा केल्या आहेत. मार्श १८३ सामन्यांमध्ये ३२ वेळा नाबाद राहिला होता. मार्श हा एक डावखुरा फलंदाज होता. शॉनला गोलंदाजी करताना बऱ्याच गोलंदाजांना धडकी भरायची. कारण फॉर्मात असताना शॉन हा अप्रतिम फटकेबाजी करायचा आणि त्यावेळी त्याला रोखणे जवळपास अशक्य समजले जायचे.

मार्शने ३८ कसोटी सामन्यांमध्ये ३४.३१ च्या सरासरीने २,२६५ धावा केल्या आहेत. मार्शने कसोटी क्रिकेटमध्ये ६ शतके आणि १० अर्धशतके केली आहेत. त्याची कसोटी कसोटी क्रिकेटमधील सर्वोत्तम धावसंख्या १८२ धावा होती. या खेळाडूने तिन्ही फॉरमॅटमध्ये ऑस्ट्रेलियासाठी १२६ सामने खेळले आहेत, २००८ ते २०१९ पर्यंतच्या आंतरराष्ट्रीय कारकिर्दीत मार्शने ५,००० हून अधिक धावा केल्या आणि १३ शतके झळकावली.