NZ vs BAN : फेअरवेल टेस्टमध्ये टेलरला मिळाला 'गार्ड ऑफ ऑनर'; टाळ्यांनी दुमदुमून गेलं स्टेडियम

NZ vs BAN : क्राइस्टचर्च : एका खेळाडूला आयुष्यात काय हवे असते? जेव्हा तो खेळायला सुरूवात करेल, तेव्हा जगाला त्याचे नाव कळेल आणि जेव्हा तो खेळातून निवृत्त होईल, तेव्हा त्याचे नाव शतकानुशतके स्मरणात राहील. न्यूझीलंडचा महान फलंदाज रॉस टेलर (New Zealand vs Bangladesh) त्याच्या कारकिर्दीतील शेवटचा सामना खेळत आहे. सोमवारी तो पहिल्या डावात फलंदाजीसाठी मैदानात उतरला, तेव्हा संपूर्ण स्टेडियममध्ये सुंदर चित्र पाहायला मिळाले.
डेव्हन कॉन्वेच्या रूपाने दुसरा गडी बाद झाल्यानंतर रॉस टेलर मैदानावर उतरला. त्याला फलंदाजीसाठी मैदानात येताना पाहून स्टेडियममधील उपस्थित लोकांनी जाग्यावर उभे राहत टाळ्या वाजविण्यास सुरवात केली. संपूर्ण स्टेडियम टाळ्यांच्या कडकडाटाने दुमदुमून गेले होते. बांगलादेशी खेळाडूंनीदेखील एकत्र येऊन टेलरला 'गार्ड ऑफ ऑनर' दिला, पण त्याला फलंदाजीत कोणतीही विशेष छाप सोडता आली नाही.

टेलर २८ धावा करून बाद झाला. पॅव्हेलियनमध्ये परतत असतानाही प्रेक्षकांनी उभे राहून त्यांचे टाळ्यांच्या गजरात स्वागत केले. जर तो पुन्हा फलंदाजीला आला नाही, तर त्याच्या नावावर ७६८३ कसोटी धावा जमा होतील. न्यूझीलंडने ज्या प्रकारे धावांचा डोंगर उभा केला आहे, त्यामुळे त्याला दुसऱ्या डावात फलंदाजी करावी लागेल, असे वाटत नाही. यासह त्याने न्यूझीलंडकडून विक्रमी ११२ कसोटी खेळण्याच्या डॅनियन व्हिटोरीच्या विक्रमाची बरोबरी केली.

न्यूझीलंडने उभारला धावांचा डोंगर
खेळपट्टीवर ५५२ मिनिटे उभे राहून ३०५ चेंडूंचा सामना करणाऱ्या टॉम लॅथमने २५२ धावांची तुफानी खेळी केली. त्याने डेव्हन कॉन्वेसोबत दुसऱ्या विकेटसाठी २१५ धावांची भक्कम भागीदारी केली. दक्षिण आफ्रिकेत जन्मलेल्या कॉन्वेने पाच कसोटी सामन्यांमध्ये तीन शतके आणि दोन अर्धशतके झळकावली आहेत, आता त्याच्याकडे नऊ कसोटी डावांमध्ये ६२३ धावा आहेत. त्याने १०९ धावांची शानदार खेळी केली. तसेच सलामीवीर विल यंगनेही अर्धशतक ठोकले. या खेळाडूंमुळे न्यूझीलंडने ६ बाद ५२१ धावांवर आपला डाव घोषित केला.

बांगलादेश १२६ धावांत गारद
बांगलादेशचे चार फलंदाज सातव्या षटकात ११ धावांवर बाद झाले होते. त्यानंतर यासिर अलीने कारकीर्दीतील पहिले अर्धशतक झळकावत डाव सावरला. तो ५५ धावांवर बाद झाला. त्यानंतर यष्टीरक्षक नुरुल हसनने ४१ धावांची खेळी केली. या दोघांव्यतिरिक्त एकाही बांगलादेशी खेळाडूला दुहेरी धावसंख्या गाठता आली नाही. सध्या न्यूझीलंडकडे ३९५ धावांची आघाडी आहे. न्यूझीलंड बांगलादेशला फॉलोऑन देणार की स्वतः दुसऱ्यांदा फलंदाजीला मैदानात उतरणार, हे उद्या कळेल.

दरम्यान, न्यूझीलंडचा दिग्गज गोलंदाज ट्रेंट बोल्टनेही ३०० कसोटी बळींचा टप्पा पूर्ण केला. अशी कामगिरी करणारा तो रिचर्ड हॅडली, डॅनियल व्हिटोरी आणि टीम साऊदी यांच्यानंतर न्यूझीलंडचा चौथा गोलंदाज ठरला आहे.