सचिनची दादागिरी; गांगुलीला दिली होती मैदानातच धमकी

भारताचा माजी महान क्रिकेटपटू सचिन तेंडुलकर आणि माजी कर्णधार व विद्यमान बीसीसीआयचा अध्यक्ष सौरव गांगुली हे दोघे चांगले मित्र आहेत. पण ही मैत्री होण्यापूर्वी सचिनने गांगुलीला चक्क करिअर संपवण्याची धमकी दिली असल्याचे आता पुढे आले आहे.

सचिननंतर गांगुलीची आंतरराष्ट्रीय क्रिकेटमध्ये एंट्री झाली. सचिन जेव्हा संघाचा कर्णधार होता तेव्हा गांगुली हा संघात नवखा होता. त्यामुळे तेव्हा सचिनने गांगुलीला चक्क घरी पाठवून करिअर संपवण्याची धमकी दिली होती.


नेमके घडले तरी काय होते...
सचिन हा १९९७ साली भारतीय संघाचा कर्णधार होता. त्यावेळी भारतीय संघ वेस्ट इंडिजच्या दौऱ्यावर गेला होता. भारत आणि वेस्ट इंडिज यांच्यामध्ये बार्डाडोस येथे कसोटी सामना सुरु होता. या सामन्यात भारताच्या गोलंदाजांनी भेदक मारा केला होता. त्यामुळे भारताला हा सामना जिंकण्यासाठी १२० धावांची गरज होती. त्यावेळी भारतीय संघ हा सामना सहज जिंकेल, असे वाटत होते. पण या सामन्यात भारताला ३८ धावांनी पराभूत व्हावे लागले. या डावात भारतीय संघातील व्ही.व्ही.एस. लक्ष्मण वगळता एकाही फलंदाजाला दोन अंकी धावसंख्या उभारता आली नव्हती. त्यामुळे सचिन फलंदाजांच्या कामगिरीवर नाराज होता.


या पराभवानंतर सचिन निराश झाला होता. त्याचबरोबर संघातील फलंदाजांवर रागावलाही होता. सचिन आपल्या रुममध्ये असताना गांगुली त्याचा राग शांत करण्यासाठी गेला होता. त्यावेळी सचिनने त्याला उद्या सकाळी धावण्याचा सराव करायला बोलावले होते. दुसऱ्या दिवशी सकाळी सचिन धावण्याचा सराव करायला गेला तेव्हा गांगुली हजर नव्हता. त्यावेळी सचिनचा पारा चढलेला होता. त्यावेळी तुला घरी पाठवेन आणि तुझं करिअर संपवून टाकेन, अशी धमकी सचिनने गांगुलीला दिली होती. सचिन असं काहीच करणार नव्हता, फक्त गांगुलीने क्रिकेटबाबत गंभीर व्हावं यासाठी सचिन असं म्हणाला होता. पण त्यानंतर गांगुलीने सचिनला कधीच निराश केले नाही आणि गंभीरपणे तो क्रिकेट खेळायला लागला. हे वृत्त दैनिक जागरण या संकेतस्थळाने दिले आहे.