धोतर-कुर्ता घालून क्रिकेटच्या मैदानात उतरले खेळाडू; संस्कृतमध्ये कॉमेंट्री

भोपाळ : क्रिकेटला जिथं धर्म मानलं जातं त्या भारतात खेळाडूंची आणि चाहत्यांची काही कमी नाही. देशभरात दररोज हजारो क्रिकेट सामन्यांचे आयोजन केले जाते. मध्य प्रदेशची राजधानी भोपाळमध्येही एका अनोख्या क्रिकेट सामन्याचे आयोजन करण्यात आले होते. या सामन्यात वैदिक विधी करणारे ब्राह्मण धोतर-कुर्ता घालून क्रिकेट खेळण्यासाठी मैदानात उतरले होते. कुणाच्या कपाळावर चंदनाचा टिळा होता, तर कोणी गळ्यात मोती-रुद्राक्षाची माळ घातली होती. भारतीय संस्कृतीचा प्रसार करणे हा या सामन्याचा उद्देश होता.

वाचा- भारताला सापडला 'मिस्ट्री स्पिनर'; चेंडू असा काही वळवला की ICC देखील हैराण झाले

विशेष गोष्ट म्हणजे क्रिकेट सामन्याचे समालोचन संस्कृतमध्ये करण्यात येत होते. संस्कृती बचाव मंचातर्फे महर्षी महेश योगी यांच्या जयंतीनिमित्त या सामन्याचे आयोजन करण्यात आले होते. या अनोख्या क्रिकेट स्पर्धेची सुरुवात वैदिक मंत्रोच्चाराने झाली. अशा प्रकारच्या स्पर्धेचे हे दुसरे वर्ष आहे. भागवत कथा सांगण्याचे काम करणाऱ्या आणि वैदिक संस्थांमध्ये शिकलेल्या ब्राह्मणांनी या स्पर्धेत भाग घेतला होता. सामना सुरू होण्यापूर्वी वैदिक मंत्रोच्चारांसह नाणेफेक करण्यात आली.

वाचा- कसोटी संघाच्या कर्णधारपदासाठी या खेळाडूने केला दावा; म्हणाला, संधी द्या, मी तयार आहे


वाचा- लवकरच गांगुली-शहा जोडीची BCCIमधून सुट्टी होणार; जाणून घ्या काय झाले

संस्कृती बचाव मंचचे अध्यक्ष पंडित चंद्रशेखर तिवारी यांनी सांगितले की, 'सामन्यात संस्थान एकादशने कपिल मुनी एकादश संघाचा आठ गडी राखून पराभव केला.' पंडित कपिल शर्मा यांनी सांगितले की, 'येथे सामनावीराला एक वेद भेट स्वरुपात दिला जातो. तर मालिकावीरासाठी पंचांग देण्यात येते. तसेच विजेत्या संघाला ५००१ रुपये आणि उपविजेत्या संघाला २१०० रुपयांचे बक्षीस देण्यात येते.'

वाचा- IPL 2022 : अहमदाबाद संघाला जॅकपॉट; ताफ्यात दाखल होणार ३ स्टार खेळाडू

या सामन्याचे काही फोटो सोशल मीडियावर व्हायरल झाले आहेत. यावर लोक वेगवेगळ्या प्रतिक्रिया नोंदवत आहेत. एका यूजरने लिहिलं आहे की, 'बुटांऐवजी चपला घाला.' तर दुसऱ्या एका यूजरने म्हटले आहे की, 'बीसीसीआय, कृपया भारतीय संघाच्या जर्सीमध्ये हा बदल करा. हा आहे नवा भारत'