विश्वविजेत्या न्यूझीलंडचा लाजिरवाणा पराभव; ९० वर्षानंतर देखील स्वप्न पूर्ण झाले नाही

ख्राइस्टचर्च : दक्षिण आफ्रिकेने दुसऱ्या कसोटी सामन्यात वर्ल्ड चॅम्पियन न्यूझीलंडचा १९८ धावांनी पराभव करुन मालिकेत १-१ अशी बरोबरी केली. न्यूझीलंडला विजयासाठी द.आफ्रिकेने ४२६ धावांचे लक्ष्य दिले होते. आफ्रिकेने २२७ धावांवर त्यांचा ऑलआउट करून विजय मिळवला. पहिल्या कसोटीत न्यूझीलंडने १ डाव आणि २७६ धावांनी विजय मिळवला होता. तेव्हा आफ्रिकेचा संघ ९५ आणि १११ धावांवर बाद झाला होता.

दोन्ही संघात झालेली २ सामन्यांची मालिका ड्रॉ झाली असली तरी दक्षिण आफ्रिकेच्या संघाने त्यांचा अजय रेकॉर्ड कायम ठेवलाय. कसोटी क्रिकेटच्या इतिहासात दक्षिण आफ्रिकेने आतापर्यंत न्यूझीलंडमध्ये एकही कसोटी मालिका गमावलेली नाही. यावेळी न्यूझीलंड संघाकडे इतिहास घडवण्याची संधी होती. पण दुसऱ्या कसोटीत द.आफ्रिकेने शानदार कामगिरी केली आणि ९० वर्षांपासूनचा विक्रम कायम ठेवला. दोन्ही संघात आतापर्यंत १७ मालिका झाल्या आहेत. त्यापैकी आफ्रिकेने १३ जिंकल्या आहेत आणि ४ मालिका ड्रॉ झाल्या आहेत. तर ४७ कसोटी सामन्यांपैकी २६ मध्ये द.आफ्रिकेने तर ५ मध्ये न्यूझीलंडने विजय मिळवलाय.

द.आफ्रिका आणि न्यूझीलंड यांच्यात पहिली कसोटीत १९३१-३२ साली झाली होती. तेव्हा द.आफ्रिकेचा संघ न्यूझीलंड दौऱ्यावर आला होता. तेव्हा आफ्रिकेने २ सामन्यांची मालिका २-०ने जिंकली. तेव्हापासून आतापर्यंत न्यूझीलंडला घरच्या मैदानावर एकदाही द.आफ्रिकेविरुद्ध कसोटी मालिका जिंकता आली नाही.