बोर्ड झाले कठोर; ...तर क्रिकेटपटूंचा पगार कापला जाणार

कोलंबो : श्रीलंका क्रिकेट बोर्डाने आपल्या खेळाडूंच्या फिटनेसबाबत नवीन मार्गदर्शक तत्त्वे जारी केली आहेत. या मार्गदर्शक तत्त्वांमध्ये असे म्हटले आहे की, जर श्रीलंकेचे क्रिकेटपटू २ किलोमीटरची धाव ८ मिनिटे १० सेकंदात पूर्ण करू शकले नाहीत, तर त्यांचा पगार कापला जाईल. नवीन मार्गदर्शक तत्त्वांनुसार, क्रिकेटपटूंसाठी वेगवेगळे पॅरामीटर्स निश्चित करण्यात आले आहेत. यामध्ये जर खेळाडूने ८ मिनिटे १० सेकंदात शर्यत पूर्ण केली, तर त्याला करारानुसार पूर्ण वेतन मिळेल. अशा खेळाडूंचा संघात समावेश होण्याचीही शक्यता जास्त असते.

वाचा- क्रिकेटपटूचे धक्कादायक वर्तन; बलात्कार करणाऱ्या मित्राला केली अशी मदत

जे खेळाडू २ किमी अंतर पूर्ण करण्यासाठी ८ मिनिटे १० सेकंद ते ८ मिनिटे ५५ सेकंद घेतात, ते राष्ट्रीय संघात निवडीसाठी पात्र असतील, पण त्यांच्या पगारातील काही टक्के रक्कम कापली जाईल. जर एखाद्या खेळाडूला २ किमी धावण्यासाठी ८ मिनिटे ५५ सेकंदांपेक्षा जास्त वेळ लागला, तर त्याला राष्ट्रीय संघात समाविष्ट केले जाणार नाही.

वाचा- कर्णधारपदानंतर आता अजिंक्य रहाणे आणि हे खेळाडू ठरणार विराटची डोकेदुखी

श्रीलंका क्रिकेट बोर्डाने या वर्षाच्या सुरुवातीला यो-यो चाचणी बदलून २ किमी धावण्याची चाचणी सुरू केली. त्यानंतर बोर्डाने खेळाडूंना २ किलोमीटरची शर्यंत पूर्ण करण्यासाठी ८ मिनिटे ३५ सेकंदांची वेळ निश्चित केली. क्रिकेट सल्लागार समितीच्या सल्ल्यानंतर ही वेळ ८ मिनिटे ५५ सेकंद करण्यात आली होती. पण आगामी स्पर्धा डोळ्यासमोर ठेवून तंदुरुस्तीचा नियम कडक करण्यात आले आहे. त्यामुळे ही वेळ ८ मिनिटे १० सेकंदांवर आणली आहे.

नवीन मार्गदर्शक तत्त्वांबाबत श्रीलंका निवड समितीचे अध्यक्ष प्रमोद्या विक्रमसिंघे यांनी सांगितले आहे की, "यावर्षी फेब्रुवारीमध्ये जर एखादा क्रिकेटपटू ८ मिनिटे ३५ सेकंदात २ किमी धावत असेल, तर आता त्याला ही शर्यत ८.१० सेकंदात पूर्ण करावी लागेल. खेळाडूंनी त्यांच्या फिटनेसवर काम करावे अशी आमची इच्छा आहे.''

श्रीलंकेच्या खेळाडूंची पहिली फिटनेस चाचणी माहेला जयवर्धनेच्या देखरेखीखाली ७ जानेवारीला होणार आहे. प्रमोद्या विक्रमसिंघे म्हणाले, 'खेळाडूंना तंदुरुस्तीबाबत सावध करणे, हा आमचा उद्देश आहे. त्यांना कठोर परिश्रम करण्यास प्रवृत्त करावे लागेल. आता या प्रकरणी कोणताही हलगर्जीपणा खपवून घेणार नाही.'