पॅट कमिन्स की स्टीव्ह स्मिथ... ऑस्ट्रेलियाच्या कर्णधारपदासाठी निवड समितीची कोणाला पसंती आहे पाहा...

मेलबर्न : तरुणीला अश्लील मेसेज पाठवल्याप्रकरणी ऑस्ट्रेलिया कसोटी संघाचा कर्णधार टीम पेनने कर्णधारपदाचा राजीनामा दिला आहे. त्यानंतर ऑस्ट्रेलिया कसोटी संघाच्या पुढील कर्णधाराचा शोध सुरू झाला आहे. या शर्यतीत उपकर्णधार पॅट कमिन्स आघाडीवर असल्याचे मानले जात आहे. त्याचबरोबर स्टीव्ह स्मिथही प्रबळ दावेदार म्हणून समोर आला आहे.

मधल्या फळीतील भरवशाचा फलंदाज आणि कर्णधारपदाचा अनुभव असलेल्या स्टीव्ह स्मिथला पुन्हा एकदा ऑस्ट्रेलिया क्रिकेट संघाचे नेतृत्व करण्याची संधी मिळू शकते. त्याला कसोटी संघाचा कर्णधार बनवता येईल, याबाबत क्रिकेट ऑस्ट्रेलियाने संकेत दिले आहेत. कमिन्सनंतर स्मिथ आणि लॅबुशेन हे कर्णधार होण्याच्या शर्यतीतले प्रमुख दावेदार आहेत.

खरं तर निवडकर्त्यांनी स्टीव्ह स्मिथच्या बाजूने कौल दिला आहे. ऑस्ट्रेलिया क्रिकेट बोर्डाने स्टीव्ह स्मिथला कर्णधार बनवावे असे निवडकर्त्यांनी सांगितले आहे. आभासी (वर्चुअल) पत्रकार परिषदेत क्रिकेट ऑस्ट्रेलियाचे अध्यक्ष म्हणाले, 'कर्णधारपदासाठी अनेक उमेदवार उपलब्ध आहेत आणि स्टीव्ह स्मिथ त्यापैकी एक आहे.'

बॉल टॅम्परिंग प्रकरणानंतर स्मिथची हकालपट्टी
२०१८ मध्ये बॉल टॅम्परिंग प्रकरणानंतर स्टीव्ह स्मिथला कर्णधारपदावरून हटवण्यात आले होते आणि त्याच्या जागी टीम पेनला कर्णधारपद देण्यात आले होते. टीम पेनने सेक्सटिंग प्रकरण उघडकीस आल्यानंतर ऑस्ट्रेलियाच्या कसोटी कर्णधारपदाचा राजीनामा दिला आहे.

ऍशेस मालिकेला फार दिवस शिल्लक नसल्याने ऑस्ट्रेलियाला लवकरात लवकर आपल्या नवीन कर्णधाराची घोषणा करावी लागणार आहे. पॅट कमिन्स आणि स्टीव्ह स्मिथ यांच्यापैकी कोणाला कांगारू कसोटी संघाचा पुढील कर्णधार बनविणार हे पाहणे औत्सुक्याचे ठरणार आहे.