राहुल द्रविडला भारताचे प्रशिक्षक मिळाल्याचे पाहून मला धक्काच बसला, रिकी पॉन्टिंग असं का म्हणाला पाहा...

सिडनी : ऑस्ट्रेलियाचा माजी कर्णधार रिकी पाँटिंगने एक मोठा खुलासा केला आहे. टीम इंडियाच्या मुख्य प्रशिक्षकपदाची ऑफर त्याला देण्यात आली होती, असे पाँटिंगने म्हटले आहे. रिकी पाँटिंग हा आयपीएलमधील दिल्ली कॅपिटल्स संघाचा मुख्य प्रशिक्षक म्हणून काम पाहत आहे आणि यादरम्यान त्यांना टीम इंडियाचे मुख्य प्रशिक्षक म्हणून पदभार स्वीकारण्याची ऑफर देण्यात आली होती, पण कामाचा भरपूर बोजा असल्याने त्याने ही ऑफर नाकारली होती. टीम इंडियाचे माजी प्रशिक्षक रवी शास्त्री यांचा कार्यकाळ टी-२० विश्वचषक २०२१ नंतर संपला आणि त्यांच्या जागी माजी अनुभवी कर्णधार राहुल द्रविडला प्रशिक्षक बनवण्यात आले आहे.

द ग्रेड क्रिकेटर पॉडकास्टशी बोलताना रिकी पाँटिंगने याबाबतचा खुलासा केला आहे. तो म्हणाला, 'मी टीम इंडियाच्या प्रशिक्षकाच्या भूमिकेत ३०० दिवस भारतात राहिलो असतो. होय, आयपीएलदरम्यान याविषयी काही लोकांशी माझे काही बोलणे झाले होते. तुम्हाला माहीत आहे की, मी ज्या लोकांशी बोललो ते मार्ग शोधण्याचा प्रयत्न करत होते. कारण मी प्रशिक्षक बनू शकत नाही, असे मी म्हटले होते. जर मी ही ऑफर घेतली असती, तर मला आयपीएल कोचिंग, चॅनल-७ यांसारख्या गोष्टी सोडून द्याव्या लागल्या असत्या, जे योग्य नव्हते, पण तुम्ही या मोठ्या गोष्टी करू शकाल, असे लोकांना वाटते ही चांगली गोष्ट आहे.'

द्रविडने प्रशिक्षकपद स्वीकारल्यानंतर पाँटिंगची प्रतिक्रिया
रिकी पाँटिंगनेही राहुल द्रविडला टीम इंडियाचा प्रशिक्षक बनवल्याबद्दल आश्चर्य व्यक्त केले. तो म्हणाला, 'मला आश्चर्य वाटते की, द्रविडला प्रशिक्षक बनवण्यात आले आहे. तो त्याच्या अंडर-१९ भूमिकेत किंवा त्याच्या अकादमीच्या भूमिकेत किती आनंदी होता. मला त्याच्या कौटुंबिक जीवनाबद्दल जास्त माहिती नाही, पण मला खात्री आहे की त्याला लहान मुले आहेत, पण याआधी मी म्हटल्याप्रमाणे, मी ज्या लोकांशी बोललो, ते त्यांना योग्य व्यक्ती सापडल्याची खात्री करून घेणार होते. जेणेकरून ते द्रविडला मुख्य प्रशिक्षक होण्यासाठी पटवू शकतील.'

बीसीसीआयचे प्रमुख सौरव गांगुली यांनी बुधवारी सांगितले होते की, द्रविडला या भूमिकेबद्दल पटवून देण्यास जास्त वेळ लागला नाही, पॉटिंगने त्यात रस दाखवला नाही.