कसोटीत रोहित शर्मा सलामीला येणार?

नवी दिल्ली : दक्षिण आफ्रिका विरुद्ध भारत यांच्यात टी-२० मालिकेनंतर कसोटी मालिका होणार आहे. कसोटी संघात रोहित शर्माला स्थान मिळू शकतं. तसंच के. एल. राहुलऐवजी रोहितला सलामीला खेळवण्याचा संघ व्यवस्थापनाचा विचार आहे. तसे संकेत निवड समिती प्रमुख एमएसके प्रसाद यांनी दिले आहेत.

वेस्ट इंडीजविरुद्धची कसोटी मालिका भारतानं सहज खिशात घातली असली तरी, सलामीच्या जोडीची कामगिरी अपेक्षित होऊ शकली नाही. मयांक अग्रवालनं चमक दाखवली. पण के. एल. राहुल अपयशी ठरला. त्यामुळं कसोटी सामन्यात रोहितला सलामीला खेळवले जाऊ शकते. त्यावर विचार सुरू आहे, असे प्रसाद म्हणाले.

सलामीवीर राहुलची कामगिरी अपेक्षित होत नाही. त्याच्या कामगिरीत सातत्य नाही. त्यामुळं राहुलऐवजी रोहितला सलामीला खेळवण्यात यावं, असं अनेक दिग्गज क्रिकेटपटूंचं म्हणणं आहे. वेस्ट इंडीज दौऱ्यातही रोहितला कसोटी संघात संधी मिळाली नव्हती. मात्र, आता त्याच्या कसोटी संघातील समावेशाबाबत विचार करण्यात येत आहे. राहुल हा निश्चितच प्रतिभावान खेळाडू आहे. कसोटी क्रिकेटमध्ये सध्या त्याची कामगिरी अपेक्षित अशी होत नाही. त्यामुळे आम्ही चिंतीत आहोत. त्यानं खेळपट्टीवर अधिक वेळ राहावं आणि त्याचा फॉर्म परत यायला हवा, असं आम्हाला वाटत असल्याचं प्रसाद म्हणाले.