जेव्हा जेव्हा बुमराह ५ विकेट घेतो, तेव्हा भारतीय संघासोबत होते ही खास गोष्ट

केपटाउन: भारत आणि दक्षिण आफ्रिका यांच्यात केपटाउन येथे तिसरी कसोटी सुर आहे. दोन दिवसाचा खेळ संपल्यानंतर टीम इंडियाने मॅचवर पकड मिळवली आहे. पहिल्या डावात फक्त २२३ धावा केल्यानंतर भारतीय गोलंदाजांनी कमाल केली आणि आघाडी मिळवून दिली. भारताच्या या कामगिरीत जलद गोलंदाज जसप्रीत बुमराहचे महत्त्वाचे योगदान होते, त्याने आफ्रिकेच्या ५ फलंदाजांना बाद केले.

वाचा- UAE नव्हे तर या देशात होणार IPL २०२२; बीसीसीआयने तयार केला प्लॉन

दोन्ही संघांसाठी ही मॅच महत्त्वाची आहे. तीन सामन्यांच्या मालिकेत दोन्ही संघांनी प्रत्येकी १ लढत जिंकली असून जो संघ तिसऱ्या सामन्यात विजय मिळवले मालिका त्याची होईल. भारतीय संघासाठी हा खास क्षण आहे, कारण टीम इंडियाने ३० वर्षात द.आफ्रिकेत एकही कसोटी मालिका जिंकली नाही. पहिल्या डावात ५ विकेट घेतलेल्या जसप्रीत बुमराहची कामगिरी भारतासाठी खास आहे. कारण बुमराहने कसोटीत जेव्हा जेव्हा पाच विकेट घेतल्या आहेत त्यापैकी एकाही सामन्यात भारताचा पराभव झालेला नाही. केपटाउन कसोटीच्या आधी बुमराहने ६ वेळा अशी कामगिरी केली होती आणि त्या सर्व सामन्यात भारताने विजय मिळवला होता. या ६ पैकी एक लढत ड्रॉ झाली होती.

वाचा- Ross Taylor: करिअरच्या अखेरच्या चेंडूवर घेतली विकेट आणि केला विक्रम

जसप्रीत बुमराहने तिसऱ्या कसोटीच्या पहिल्या डावात २३.३ षटकात ५ विकेट घेतल्या. यापैकी ८ षटके निर्धाव होती. त्याची इकॉनमी फक्त १.७८ इतकी होती. सध्या सुरू असलेल्या द.आफ्रिकेविरुद्धच्या कसोटी मालिकेत पाच घेणारा तो पहिला भारतीय गोलंदाज आहे.

वाचा- ऑस्ट्रेलियाने स्वप्नात देखील विचार केला नसेल; टीम इंडियाने केली मजबूत धुलाई

बुमराहच्या ५ विकेट आणि निकाल

२०१८- भारत विरुद्ध द.आफ्रिका, बुमराहच्या ५ विकेट- विजय
२०१८- भारत विरुद्ध इंग्लंड, बुमराहच्या ५ विकेट- विजय
२०१८- भारत विरुद्ध ऑस्ट्रेलिया, बुमराहच्या ६ विकेट- विजय
२०१९- भारत विरुद्ध वेस्ट इंडिज, बुमराहच्या ५ विकेट- विजय
२०१९- भारत विरुद्ध वेस्ट इंडिज, बुमराहच्या ६ विकेट - विजय
२०२१- भारत विरुद्ध इंग्लंड, बुमराहच्या ५ विकेट- ड्रॉ



बुमराहने २०१८ साली केपटाउन मैदानावर कसोटीत पदार्पण केले होते. या मैदानावर पदार्पणाच्या सामन्यात त्याने ४ विकेट घेतल्या होत्या. आता पुन्हा एकदा त्याने कमाल केली आहे. काही काळापासून बुमराह त्याच्या फॉर्ममध्ये दिसत नव्हता. पण आता तो पुन्हा आक्रमक गोलंदाजी करताना दिसत आहे.