गुगल सर्च केल्यावर मुख्यमंत्री एकनाथ शिंदेंनंतर प्रवीण तांबेला पसंती का, जाणून घ्या एकच कारण

मीरपूर : गुगलवर आपण सर्वच काही ना काही गोष्ट सर्च करत असतो. गुगलने आता २०२२ साली सर्वात सर्च करण्यात आलेल्या व्यक्तींची यादी जाहीर केली आहे. या यादीमध्ये महाराष्ट्राचे मुख्यमंत्री एकनाथ शिंदे यांच्यानंतर सर्वाधिक सर्च हा क्रिकेटपटू प्रवीण तांबेसाठी केला गेला आहे.

एकनाथ शिंदे यांच्यामुळे या वर्षी राजकारणात मोठा उलथापालथ पाहायला मिळाली. महाराष्ट्रात राजकीय भुकंप आला आणि त्यामुळेच महाराष्ट्रात सत्ता बदलली गेली. महाविकास आघाडी जाऊन आता शिंदे मुख्यमंत्रीपदी विराजमान झाले आहेत. त्यामुळे शिंदे यांच्या नावाने जास्त सर्च केला जाऊ शकतो, हे आपण समजू शकतो. पण त्यानंतर प्रवीण तांबेचा क्रमांक कसा आला, याचे आश्चर्य काही जणांना वाटले आहे. पण प्रवीण तांबेच्या नावाने सर्वात जास्त सर्च का केला गेला, याचेही एकमेव कारण आता समोर आले आहे.

प्रवीण तांबे जवळपास ४०व्या वर्षी आयपीएलमध्ये खेळायला आला आणि त्यानंतर तो जगप्रसिद्ध झाला. प्रवीणने आयपीएल गाजवली आणि त्यानंतर त्याच्या नावाला वलय निर्माण झाले. प्रवीणचे रणजी करंडक खेळण्याचे स्वप्न होते. खेळाडू रणजी क्रिकेटमधून आयपीएलमध्ये जातात, पण प्रवीणबाबत मात्र उलटे पाहायला मिळाले. कारण आयपीएल खेळल्यावर प्रवीणला रणजी करंडक क्रिकेट स्पर्धेत खेळण्याची संधी मिळाली आणि त्याचे स्वप्न पूर्ण झाले. प्रवीणची जर आयुष्याची गोष्ट पाहिली तर त्यामध्ये जास्त संघर्ष असल्याचे जाणवते.

प्रवीणने आयपीएलमध्ये स्थान मिळवण्यासाठी जोरदार संघर्ष केला. प्रवीणच्या या संघर्षाची प्रेरणादायी कहाणी, जेव्हा बॉलीवूडच्या पडद्यावर झळकली तेव्हा त्यालाही चांगली पसंती मिळाली. कारण आयपीएलच्या काळात प्रवीण तांबेवरील सिनेमा प्रदर्शित करण्यात आला. 'कौन हैं प्रवीण तांबे...' हा सिनेमा १ एप्रिलला भारतामध्ये प्रदर्शित झाला आणि या सिनेमाला उदंड प्रतिसाद मिळाला. या सिनेमामध्ये प्रवीणची भूमिका मराठी स्टार श्रेयस तळपदेने केली होती. या सिनेमामुळे प्रवीणचा संघर्ष प्रत्येक घरात पोहोचला. त्याचबरोबर या सिनेमाची उत्सुकता लोकांना होती. त्यामुळे त्यांनी गुगलवर प्रवीण तांबेच्या नावाने सर्च केले. त्यामुळे भारतामध्ये सर्वात सर्च केलेल्या नावांमध्ये एकनाथ शिंदे हे आठव्या स्थानावर आहेत, तर प्रवीण तांबे हा नवव्या स्थानावर आहे. पण या यादीत प्रवीणचा अपवाद वगळता एकही क्रिकेटपटू नाही. या वर्षात भारतीय क्रिकेटची वाताहत झाल्याचे पाहायला मिळाले. त्यामुळे भारताच्या क्रिकेटपटूंच्या नावाने जास्त सर्च केले गेले नसावे, असे म्हटले जात आहे.