लॉर्ड्सच्या बाल्कनीत रंगला विराट कोहलीचा भन्नाट नागीण डान्स; चाहते म्हणाले...

INDvsENG : लंडन : दुसऱ्या कसोटी सामन्याच्या दुसऱ्या दिवशी भारताचा कर्णधार विराट कोहली लॉर्ड्सच्या बाल्कनीत नागिन डान्स करताना दिसला. कोहलीचा हा फोटो सध्या सोशल मीडियावर व्हायरल होत आहे. यावेळी नाचताना कोहलीच्या चेहऱ्यावर एक मोठे हास्य पाहायला मिळत आहे. मोहम्मद सिराज, के.एल. राहुल आणि मयांक अग्रवाल देखील लॉर्ड्सच्या बाल्कनीत कोहलीच्या या नृत्याचा आनंद घेत आहेत. सर्वचजण खूप आनंदी असून हसताना दिसत आहेत.
एका चाहत्याने कोहलीचा डान्स फोटो शेअर केला आणि लिहिले, 'कोहली नागिन नृत्य करत आहे की काहीतरी? दुसऱ्या एका चाहत्याने लिहिले, 'किंग कोहली लॉर्ड्सच्या बाल्कनीत डान्स करतो.'

टीम इंडियाने 97 धावांमध्ये 8 गडी गमावले
भारताने आपले शेवटचे 8 गडी 97 धावांत गमावले. पहिल्या दिवसाच्या शेवटच्या क्षणांमध्ये कर्णधार विराट कोहली बाद झाला, तर दुसऱ्या दिवशी भारताने पहिल्या सात चेंडूंच्या आत दोन चांगले फलंदाज गमावले. भारताकडून अष्टपैलू खेळाडू रविंद्र जडेजा (120 चेंडूत 40) आणि रिषभ पंत (58 चेंडूत 37 धावा) यांनी सहाव्या विकेटसाठी 49 धावांची भागीदारी केल्याने भारताने 350 धावांचा टप्पा ओलांडला. भारत चार गोलंदाजांसह खेळण्यासाठी उतरला आहे.

भारत आणि इंग्लंड यांच्यामध्ये लॉर्ड्स क्रिकेट मैदानावर दुसरा कसोटी सामना खेळला जात आहे. या कसोटी सामन्याच्या दुसऱ्या दिवशी भारताने इंग्लंडविरुद्ध पहिल्या डावात 364 धावांचे आव्हान उभे केले आहे. प्रत्युत्तरादाखल मैदानात उतरलेल्या यजमानांनी चांगली सुरवात केली. दिवसभराचा खेळ संपला तेव्हा इंग्लंडच्या धावफलकावर 3 बाद 119 धावा जमा झाल्या होत्या. जो रुट अँड कंपनी पहिल्या डावात भारताच्या एकूण धावांपेक्षा 245 धावांनी मागे आहे.

भारतीय कर्णधार विराट कोहलीने पहिल्या डावात 42 धावा केल्या. कोहली गेल्या 48 डावांपासून कसोटीत शतक झळकावण्यात अपयशी ठरला आहे. त्याने नोव्हेंबर 2019 मध्ये बांगलादेशविरुद्ध डे नाईट कसोटी सामन्यात शेवटचे शतक झळकावले होते. त्यानंतर त्याला आतापर्यंत शतक झळकावता आलं नाही.