सेहवागने शेअर केले पुलवामातील शहीदांच्या मुलांचे शाळेतले फोटो

जम्मू-काश्मीरमधील पुलवामा येथे एक वर्षापूर्वी १४ फेब्रुवारी २०१९ रोजी सीआरपीएफच्या जवानांवर आत्मघाती हल्ला झाला होता. या हल्ल्यात ४० जवान शहीद झाले होते. या हल्ल्यातील शहीद झालेल्या दोन जवानांच्या मुलांच्या शिक्षणाची जबाबदारी सेहवागने घेतली होती.

सेहवागने गुरूवारी ट्विटरवर दोन मुलांचे फोटो शेअर केले. त्यातील एक मुलगा फलंदाजी करताना दिसत आहे. तर दुसरा गोलंदाजी करत आहे.

हे दोन फोटो शेअर करताना सेहवाग म्हणतो, पहिल्या फोटोत अर्पित सिंह फलंदाजी करत आहे. अर्पितचे वडील राम वकील पुलवामा हल्ल्यात शहीद झाले होते. तर गोलंदाजी करणारा राहुल सोरेंग असून तो शहीद जवान विजय सोरेंगे यांचा मुलगा आहे.

मला अभिमान वाटतो की या दोन्ही मुलांच्या शिक्षणाची जबाबदारी घेता आली, असे सेहवागने म्हटले आहे.

भारताकडून २५१ वनडे, १०४ कसोटी आणि १९ टी-२० सामने खेळणाऱ्या सेहवागने हरियाणात स्वत:ची शाळा सुरू केली आहे. या शाळेला तो नियमीतपणे भेट देत असतो. पुलवामा हल्ल्यात शहीद झालेल्या दोन जवानांच्या मुलांचे शिक्षण याच शाळेत सुरू आहे.